«Ытык Бүлүү алгыстаах ыһыаҕын» успуорт национальнай көрүҥнэригэр «Бүлүү Боотур-2024» өрөспүүбүлүкэтээҕи аһаҕас күрэһин муҥутуур кыайыылааҕынан Тимофей Большаков буолла.
«Бүлүү Боотур» успуорт национальнай көрүҥнэригэр быйылгы күрэхтэһиитигэр 8 улуустан кытыннылар. Күрэхтэһиигэ өрөспүүбүлүкэҕэ биллэр-көстөр спортсменнар бааллар. Онон да буолуо, Бүлүүгэ икки күннээх боотурдар күрэстэрин түмүгүн өрөспүүбүлүкэ бүттүүн да күүттүбүт быһыылаах.
Бастакы күн боотурдар түөрт көрүҥҥэ киирсибиттэрэ. Онно биһиги Тимофей Большаковпут кыыс эккирэтиитигэр, мас тардыһыыга бастакы, үс төгүл үскэ иккис, оҕунан ытыыга сэттис миэстэлэри ылан, уопсай түмүгүнэн бастаабыта.
Бүгүн күрэстэһээччилэр тутум эргииргэ, хапсаҕайга, таас көтөҕүүтүгэр күөн көрүстүлэр. Тимофей 115 киилэ ыйааһыннаах сымара тааһы 133 м көтөҕөн, үһүс бочуоттаах миэстэни ылла. Бу көрүҥҥэ Айсен Ботуев бастаата, иккискэ Петр Прудецкай таҕыста.
Онон уопсай түмүккэ «Бүлүү Боотур-2024» муҥутуур кыайыылааҕынан Тимофей Большаков буолла уонна 500 тыһ. уу харчынан наҕараадаланна. Иккискэ Петр Прудецкай таҕыста. Кини 300 тыһ. солк. бириэмийэлэннэ. Үсүһү Айсен Ботуев ылан 200 тыһ. солк. бириэмийэлэннэ.
Тимофей Большаковы өссө биир кыайыытынан эҕэрдэлиибит. Билигин Тимофейы аны «Дыгын оонньуулара» күүтэр.
Яина Власьева
Бүлүү улууһун «Олох суола» хаһыат кэрэспэдьиэнэ хаартыскаҕа түһэриилэрэ