Тойбохой орто оскуолатыгар финансовай грамотнаһы сайыннарыыга туһаайыллыбыт уолаттарга улуустааҕы дьыалабыай оонньуу ыытылынна. Манна уопсайа 6 хамаанда биисинэс-былаан оҥорон, экспертнэй хамыыһыйа иннигэр көмүскээтилэр. Уолаттар ааҕыыларын Тойбохой оскуолата 2010 сылтан тэрийэн ыытар.
Быйылгы дьыалабыай оонньуу оскуола биир киэн туттар выпускнигар Михаил Романович Леонтьев сырдык аатыгар ананна. Кини оскуола бастыҥ үөрэнээччитэ, уолаттартан бастакы медалист, спортсмен, уопсастыбанньык. Михаил Леонтьев олоҕо, үлэлээбит үлэтэ үөрэнээччилэргэ үтүө холобур буолар.
Дьүүллүүр сүбэҕэ Сунтаар улууһун экономическай сайдыыга управлениетын салайааччыта Ия Ефремова, управление исписэлииһэ Мария Спирова, улуустааҕы үөрэҕирии салалтатын начальнигын солбуйааччы Борис Васильев, Тойбохой нэһилиэгин баһылыга Станислав Егоров, Тотонов Айаал Валерьевич — Тойбохой оскуолатын дириэктэрэ Айаал Тотонов үлэлээтилэр.
Дьыалабыай оонньуу кыттыылаахтара рыногы ырыттылар, бородууксуйа конкурентноспособноһын үөрэттилэр. Ону тэҥэ тэрилтэлэр үлэлэрин, үп-харчы быһаарыытын хайдах ылыналларыгар туох дьайыылары оҥороллорун, туох фактордар хайдах үлэлииллэрин өйдүүллэригэр көмөлөстө.
Хас биирдии хамаанда бэйэтин бырайыагын билиһиннэрдэ. Экспертэр кыттааччыларга күүстэрин, мөлтөх өрүттэрин үчүгэйдик өйдүүллэригэр көмөлөстүлэр.
Биисинэс-былааннары көмүскээһин кэнниттэн экспертэр түмүк таһаардылар. Ол курдук күрэх түмүгүнэн:
«Лучшая презентация» анал аат — Аллыҥа орто оскуолата (бырайыактара «ЭкоЛайф»); «Лучшая бизнес-идея» — Аллыҥа орто оскуолата («Мобильная точка по продаже холодных напитков из лимона и брусники»); «Лучшее обоснование» — Арыылаах орто оскуолата (бырайыактара «Георгий и его команда»)
3-с истиэпэннээх диплом Сунтаардааҕы лиссиэй хамаандатыгар ананна, бырайыактара «Квест — комната»;
2-ис истиэпэннээх диплом — Дьаархан орто оскуолата («Зеленые возможности»);
Кыайыылаах үрдүк аатын Тойбохой орто оскуолатын хамаандата ылла, бырайыактара «Хочо оҥоһуктара».
Бастыҥ хамаандалар грамотанан, бириистэринэн бэлиэтэннилэр. Ону таһынан Михаил Леонтьев аймахтара туруорбут анал бириэмийэтин туттардылар.
Улуустааҕы дьыалабыай оонньуу бары өттүнэн интэриэһинэй, үөрэнээччилэри сайыннарар көдьүүстээх ньыманан буолла. Кыттааччылар саҥа билиини эрэ буолбакка, дьоҕурдарын салгыы сайыннарарга кыах ыллылар.
Үөрэҕирии салалтатын пресс-сулууспата