Бүгүн Сунтаардааҕы 1-кы №-дээх орто оскуола актовай саалатыгар Арассыыйа кикбоксиҥҥа үтүөлээх тириэньэрэ Анатолий Иванович Афанасьев туһунан «Легендарный тренер Анатолий Афанасьев. Тарбыйах титиигиттэн — аан дойду рингэлэригэр» диэн кинигэ сүрэхтэниитэ буолла.
Кинигэни Анатолий Иванович улахан кыыһа суруналыыс идэлээх Дария Анатольевна сүүрэн-көтөн таһаартарбыт. 360 страницалаах, 200-тэн тахса хаартыскалаах 1000 ахсааннаах дьоһун кинигэ Новосибирскай куоракка бэчээттэммит.
Манна диэн эттэххэ, үгүспүт Анатолий Афанасьевы кикбоксиҥҥа үс аан дойду чөмпүйүөннэрин — Оксана Васильеваны, Лидия Андрееваны, Мария Кривошапкинаны уонна Европа чөмпүйүөнэ Александр Сидоровы эрчийэн таһаарбыт тириэньэр эрэ курдук саныыбыт…
Кини үлэтин 1971 сылтан Сунтаар 1-кы №-дээх орто оскуолатын муусука учууталынан саҕалаабыт эбит. Ити сыл Дьокуускайдааҕы 1-кы №дээх педагогическай училище музыкальнай салаатын үөрэнэн бүтэрбит. Өссө кини «Чороон» ВИА солиһа буола сылдьыбыт. Онно үлэлии сылдьан бастаан утаа оҕолорго тустуу куруһуогун аһан үлэлэппит. Ити кэмтэн ыла Анатолий Иванович тириэньэр быһыытынан өрөспүүбүлүкэҕэ биллэн барбыта. Эрчийэр оҕолоро Арассыыйа таһымнаах күрэхтэһиилэргэ кыттан, бириистээх миэстэлэргэ тиксэр буолбуттар.
Дария Афанасьева кинигэҕэ аҕата оҕолору эрчийэр методикатын эмиэ киллэрбит. Кини «баҕар, успуорка сыһыаннаах киһи ааҕан баран, бэйэтигэр туһаныа» диэн эрэллээх.
Эрчийэр оҕолорун кытта ханнык эмэ дойдубут соҕуруу куоратыгар тиийэн күрэхтэстэхтэринэ, кини иитиллээччилэрин көбүөргэ ыҥыралларыгар эбэһээт: «… из города Сунтар” диэн биллэрэллэр эбит. Ону быһаара сатыыр эбит даҕаны, истибэттэр эбит.
Анатолий Иванович бэйэтин олоҕор тугу санаабытын аһаҕастык этэрин туохтааҕар да ордороро. Ол иһин сорохтор кинини истэригэр киллэрбэттэрин туһунан кинигэ сүрэхтэниитигэр кэлбит дьон эттилэр. Дьиҥэр, кини бэйэтин туһугар буолбакка, уопсай дьыала, эрчийэр оҕолорун туһугар көрдөһөр буоллаҕа.
Төһө да үгүс кыһалҕаны көрсүбүтүн иһин, кини тириэньэр быһыытынан үлэтэ үрдүктүк сыаналанан, 2003 с. киниэхэ «Арассыыйа үтүөлээх тириэньэрэ» аат иҥэриллэр. Дьиктитэ баар, ити кэмҥэ киниэхэ «СӨ үтүөлээх тириэньэрэ» ааты иҥэрэ иликтэрэ буолар.
Олоҕун бүтэһик сылларыгар кини чугас дьонугар: «Киһини тыыннааҕар чиэстиир наада», — диэн хом санаатын эппит эбит. Төһө да тус олоҕор үгүс мэһэйдэри көрүстэр, санаабытын барытын ситиспит киһи быһыытынан улууһун дьоно-сэргэтэ саныыр буолуохтаах.
Бу дьоро күн кинини билэр, ытыктыыр дьон, иитиллээччилэрэ үгүс үтүө тылы эттилэр. Кинилэр истэригэр «Лоҥкур» б/х салайааччыта Александр Попов, бэтэрээн тустуук Роман Иванов, бэтэрээн-педагог Юрий Мекумянов, ырыаһыттар Василий, Мария Спиридоновтар, Сунтаар нэһилиэгин баһылыга, иитиллээччитэ Эдуард Филиппов, 1-кы №-дээх оскуола дириэктэрэ Афанасий Матвеев, аймахтарын ааттарыттан Софья Игнатьева, уола Ньургун Афанасьев уо.д.а.
Дьэ, ити курдук илиҥҥи дойдулар кикбоксинг, тхэквондо курдук бойобуой көрүҥнэрин Сунтаарбыт улууһугар сайыннарбыт биир киэн туттар киһибит туһунан ахтан-санаан аастыбыт.
Гаврил АНДРЕЕВ.
Георгий Афанасьев хаартыскаҕа түһэриилэрэ.