Бүгүҥҥүттэн, ол эбэтэр тохсунньу 23 күнүттэн Красноярскайга икки төгүллээх олимпийскай чөмпүйүөн Иван Ярыгин Кубогар спортивнай тустууга норуоттар икки ардыларынааҕы турнир саҕаланна. Онно Саха сириттэн барыта 26 спортсмен кыттар: эр дьоҥҥо – 22, дьахталларга – 4.
Биһиги улууспутуттан үс бөҕөс турнир көбүөрүгэр тахсыахтара. Ол курдук, эдэрдэргэ Арассыыйа лидерэ, элбэҕи эрэнэр уолбут Лев Павлов 57 кг ыйааһыҥҥа, Юлиан Григорьев 65 киилэҕэ уонна Ньургун Сергин 92 кг ыйааһыҥҥа тусталлар.
Турнир тохсунньу 26 күнүгэр түмүктэнэр. Уолаттарбытыгар ситиһиилэри баҕарабыт.
Бу үс күҥҥэ турниртан Николай Бястинов репортаһын «Тэтим» саха араадьыйатыгар истиэхпит, ону тэҥэ быһа холбонууну «Мамонт» телеканалга уонна «Саха» НКиХ ВКонтакте бөлөҕөр көрүөхпүт.
Яина ВЛАСЬЕВА