Сунтаар улууҺун Түбэй Дьаарханыгар Арассыыйаҕа Дьиэ кэргэн, Саха сиригэр Оҕо саас, Сунтаарга кырдьаҕастарга ытыктабыл сылларын чэрчилэринэн, Түбэй Дьаарханнааҕы Нина Потапова салайааччылаах «Аман өс» оҕо норуодунай фольклорнай тыйаатыра тэриллибитэ 35 сылыгар аналлаах уус-уран самодеятельноһы көрүү үрдүк тэрээһиннээхтик, ыраахтан, чугастан ытык-мааны ыалдьыттардаах бэрт сэргэхтик ааста.
Күрэскэ барыта 15 оскуолаттан, 27 бөлөхтөн 175 үөрэнээччи кытынна. Эриһиилээх күрэс түмүгүнэн Гран-при хаһаайыннарынан буоллулар:
Театральнай туруорууга: Бордоҥ оскуолатыттан «Номох буолбут снайпер» инсценировка — салайааччы Любовь Петрова.
Фольклорнай көрүүгэ:
Кутана оскуолатыттан «Мөҕүрүүр бөҕө уонна Кулан Кыырпай» инсценировка, салайааччы — Мария Афанасьева.
Ырыа көрүҥэр түбэйдэр оҕолоро кимиэхэ да иннилэрин биэрбэтилэр. Сыаналаах бириистэри улуус култууратын уонна айылгытын салалтата, Нина, Фрументий Софроновтар, Анита, Дуолан Трофимовтар дьиэ кэргэттэрэ туруордулар. Атын да номинациялары талааннаах оҕолорго туттарыыны көрөөччүлэр истиҥ биһирэбил, дохсун ытыс тыаһынан догуһуоллаатылар.
Тэрээһин фейерверинэн, минньигэс торт үллэстииитинэн түмүктэннэ. Мустубут дьон олоҥхоһут, чабырҕахсыт, үҥкүүһут оҕолору олус хайҕаан уһуннук ытыс таһыннылар. Оҕолор, төрөппүттэр үөрүүлэрэ муҥура суох. Төрөппүттэр түмсэн ас-үөл астаан оҕолору аһаттылар, маанылаатылар. Итии чэйдээх буфет күнү быһа үлэлээтэ. Айар талааннаах оҕолорго алгыстаах аартыгы баҕарабыт!
Вера СОЛДАТОВА-НАНОВА, саха суруйааччыларын, Арассыыйа суруналыыстарын сойууһун чилиэнэ