Сунтаар улууһа (оройуона) муниципальнай оройуон дьаһалтатын уонна оройуон Сэбиэтин дьокутааттарын ааттарыттан улууспут олохтоохторун Саха Өрөспүүбүлүкэтин Судаарыстыбаннаһын күнүнэн итиитик-истиҥник эҕэрдэлиибит!
Балаҕан ыйын 27 күнэ – Саха Өрөспүүбүлүкэтигэр улахан суолталаах күн. 1990 с. бу күн Судаарыстыба суверенитетын туһунан декларация ылыныллан СӨ судаарыстыбаннаһа бигэргэммитэ. Бу историческай докумуон Өрөспүүбүлүкэбит инникитин тутулуга суох сайдарын түстээбитэ.
Бүгүн өрөспүүбүлүкэбитигэр экэниэмикэ, оҥорон таһаарыы, үөрэх, социальнай эйгэ уо.д.а. хайысхалар аныгы олох тэтимин кытары тэҥҥэ сайдан иһэллэр. Сахабыт сирэ, улууспут инники сайдыытыгар нэһилиэнньэ олоҕун таһымын үрдэтиигэ бары бииргэ ылсан үлэлиэх тустаахпыт.
Күндү биир дойдулаахтарбыт Саха Өрөспүүбүлүкэтин Судаарыстыбаннаһын күнүнэн өссө төгүл эҕэрдэлиибит! Чэгиэн-чэбдик, нус-хас олоҕу, бары үтүөнү, үрдүк ситиһиилэри, сарсыҥҥыга эрэли баҕарабыт.
Анатолий Григорьев,
«Сунтаар улууһа (оройуона)»
муниципальнай оройуон баһылыга.
Ульяна Попова,
Сунтаар улууһун дьокутааттарын
Сэбиэтин бэрэссэдээтэлэ.
