Кубулҕаттаах кулун тутар 1 күнүгэр Тэҥкэ нэһилиэгэр «Дьоҕур» түмсүү салайааччыта Розалия Кириллина тэрийиитинэн, кулууп үлэтигэр көмө буоллун диэн аһымал кэнсиэр буолла.
Кэнсиэркэ Тэҥкэ нэһилиэгэр «Кустук» кулуупка үлэлээн ааспыттар мустан кэнсиэр көрдөрдүбүт. Ол курдук, кулууп дириэктэрдэрэ Валентина Яковлева, Розалия Кириллина, Розалия Сидорова, Мария Попова уонна уус-уран салайааччылар Василий Евсеев, Алена Васильева, Агафья Петрова ырыа, тойук толордубут. Кэнсиэркэ «Дьоҕур» түмсүү кыттыылаахтара ааспыт кэми санатан сыаҥка арааһын, үҥкүүлэри, ырыалары бэлэх ууннулар.
Сунтаартан биир кыдьыктаахтарым «абытайдарым» Владимир, Туйаара Ивановтар, Изабелла Жиркова кэлбит дьону «без быара» ыыталаатылар, «Сарасвати» индийскэй үҥкүү салайааччыта Саргылана Докторова үҥкүүтүнэн, кэрэ симэҕинэн оҕолору, олохтоохтору абылаата. Уус уран салайааччынан үлэлээбит ыччаттарбыт Василий Евсеев кэргэнинээн Аленалыын, Петрова Агафья дьүөгэтинээн ылбаҕай ырыаларын бэлэхтээн ытыс тыаһын хомуйдулар.
Кэнсиэр кэмигэр «Дьоҕур» түмсүүлэр илиилэринэн оҥорбут киэргэллэрин аукциоҥҥа туруоран дьон интэриэһин тартылар. Кэнсиэр бүтүүтэ остуол тула олорон ааспыты ахтыстыбыт, оонньоон да ыллыбыт.
«Эдэр дьоҥҥо холобур буолан маннык дьоро киэһэни тэрийбит «Дьоҕур» түмсүү салайааччытыгар Розалия Алексеевнаҕа уонна кэнсиэркэ кыттыбыт артыыстарга барҕа махталбын тириэрдэбин. Нэһилиэк олоҕор күүс-көмө буоларгыт миигин үөрдэр» — диэн нэһилиэк баһылыга Николай Лидочен махталын биллэрдэ.
«Аһымал» кэнсиэртэн киирбит үп кулуупка үлэлии сылдьыбыт, Тэҥкэ олохтооҕор, СВО-ҕа барбыт Денис дьиэ кэргэнигэр бэрилиннэ.
Ити курдук ааспыт кэрэ кэмнэрбэр эргитэн ылбыт Розалия Алексеевнаҕа, көх- эм буолан кыттыспыт доҕотторбор, дьүөгэлэрбэр «Дьоҕур» түмсүү кыттыылаахтарыгар, сылаас ытыс тыаһын бэлэхтээбит Тэҥкэм олохтоохторугар барҕа махталбын тириэрдэбин.
Сааһырдыбыт диэн саарбахтаабакка,
Сорсуйан эрэбит диэн суламмакка,
Саҥа олох суолун устун
Үтүө санаа утаҕынан угуттанан,
Ил-эйэ былааҕын күөрэччи тутан
Олохпут суолун устун
Айаннатан иһиэҕиҥ!
Дьол соргу тосхойдун!
Уйгу быйаҥ үксээтин ! — диэн алгыс баһын сыалаатаҕым буоллун.
Үлэлээн ааспыт кулууп дириэктэрэ
Розалия Сидорова — Ымыычаана