2021 сылтан Уһук Илиҥҥэ РФ Бэрэсидьиэнин боломуочуйалаах бэрэстэбиитэлэ Юрий Трутнев көҕүлээһининэн “Уһук Илиҥҥэ 1000 тиэргэн” федеральнай бырагыраама көдьүүстээхтик үлэлиир. Бу социальнай инфраструктураны тупсарарга, нэһилиэнньэ олоҕо табыгастаах буоларыгар туһуламмыт федеральнай бырагыраама буолар. Биһиги өрөспүүбүлүкэбитигэр бу тосхолунан кэккэ сылларга бэрт элбэх былаһаакка, паарка тутуллан олоххо киирдэ.
Бырагыраама хара бастаан үлэлээтин кытта Сунтаар нэһилиэгин дьаһалтата бу тосхолго киирэн, территорияны тупсарыыга ылсыбыта. Бастакынан тутуллар былаһаакканы тутуу ханан буоларын олохтоох дьон талалларыгар кыах бэриллибитэ. Ол курдук уопсастыбаннас быһаарыытынан Ленин уул. 91/1 уонна Октябрьскай уул. 57 нүөмэрдээх дьиэлэрин территорияларыгар оҕо былаһааккалара тутуллан 2022 с. сэтинньитигэр үлэҕэ киирбиттэрэ.
Онтон 2022 с. Элгээйи нэһилиэгэ бу бырагыраамаҕа киирэн, дьон сынньанарыгар аналлаах дьоҕус паарканы тутуу үлэтэ саҕаламмыта. Паарка тупсаҕай гына кэмигэр тутуллан, 2023 с. бэс ыйыгар олохтоохтор Бүлүү эбэ кытылыгар тутуллубут дьоҕус паарка аһыллар дьоро түгэнигэр мустубуттара.
Былырыын 2023 с. Сунтаарга Кыайыы 30 сыла уулуссаҕа, Сунтарскай переулок 1 А дьиэтин территориятыгар эмиэ бу тосхолго хабыллан тупсарыллыбыт тиэргэннэр баар буолбуттара нэһилиэнньэни үөрдүбүтэ.
Марфа ИВАНОВА