Ааһан эрэ сылга саамай элбэх оҕону түмпүт, улахан, көстүүлээх «Үрүҥ тугутчаан» оҕо урамньытын бэстибээлин түмүгэ билиннэ. Дьокуускай куоракка ахсынньы 2- 6 күнүгэр буолбут бэстибээлгэ 2000 тахса кэриҥэ оҕо мустан хас да хайысханан айар талааннарын көрдөрөн биир улахан дьоллоох оҕо саас түһүлгэтин төрүттээтилэр. Сунтаар улууһун оҕолоро бу бэстибээлгэ чиэстээхтик кыттан дойдуларыгар ситиһии көтөллөнөн кэллилэр. Ол курдук, Түбэй орто оскуолатын 9 кылааһын үөрэнээччитэ Юра Борисов «Моотуона» диэн монологунан «Уран тыл» хайысхатыгар 2 истиэпэннээх лауреат буолла.
Сунтаартан саамай кыра кыттааччылар Тэҥкэ нэһилиэгин алын сүһүөх оскуола- саад үөрэнээччилэрэ «Ырыа» хайысхатыгар 3 истиэпэннээх лауреат аатын ылан үөрдүлэр-көттүлэр.
Бордоҥ орто оскуолатын үөрэнээччилэрэ «Ситим» айар устуудьуйа оҕолоро Н.Г.Алексеева- Начын Сээн «Номох буолбут снайпер» диэн биир дойдулаахпыт, аатырбыт снайпер Егор Петров туһунан көрдөрүүлэринэн «Тыйаатыр» хайысхатыгар 2 истиэпэннээх лауреат үрдүк аатын ыллылар.
Маны таһынан, СПТЛИ 7 кылааһын үөрэнээччилэрэ «Үҥкүү» хайысхатыгар «Оһуор» үҥкүүнү толорон улуустарын аатын дорҕоонноохтук билиһиннэрдилэр.
«Үрүҥ тугутчаан» бэстибээл чэрчитинэн оҕолорго маастар кылаастар араас тэрээһиннэр буоллулар. Бэстибээлгэ сылдьыбыт оҕолор бары кэриэтэ үөрүү-көтүү аргыстаах, элбэҕи билэн-көрөн кэлбиттэрин этэллэр.
Мира АФАНАСЬЕВА