Дойду үрдүнэн «Үрүҥ торуоска» харахтарынан көрбөт, доруобуйаларыгар хааччахтаах дьоҥҥо анаан ыытылла турар аахсыйаҕа кыттыһан, Уһун Күөл нэһилиэгин оскуолатын 5-с кылаастан үөһээ үөрэнэр оҕолоругар анаан бибилэтиэкэ уруога буолла. Уруок сыала-соруга -доруобуйаларыгар хааччахтаах дьоҥҥо болҕомтону, бэйэ-бэйэҕэ ытыктабыллаах сыһыаны, тулуурдаах буолууну иҥэрии. Оскуола уонна олохтоох бибилэтиэкэ үлэһиттэрэ Фекла Григорьева, Александра Павлова харахтарынан доруобуйаларыгар хааччахтаах улуу дьон олохторун, үлэлэрин туһунан билиһиннэрдилэр уонна Брайль ньыматын томтоҕор туочукаларынан тарбах иминэн даҕатан ааҕар, суруйар ньыма туһунан кэпсээтилэр.
Үөрэнээччилэр маннык кыһалҕалаах дьон туох ыарахаттары көрсөллөрүн ону тэҥэ хайдах кинилэрдиин алтыһыахха сөптөөҕүн билистилэр. Ол кэннэ анал маасканы кэтэннэр иммерсивнай трениҥҥэ кытыннылар.
Алена ИВАНОВА