Медицинскэй сиэстэрэлэр – быраастар сүрүн көмөлөһөөччүлэрэ, эмтэнээччини кытары быһаччы үлэлиир дьон. Кинилэр ыам ыйын 12 күнүгэр бэйлэрин идэлээх бырааһынньыктарын бэлиэтииллэр.
Бу бэлиэ күн чэрчитинэн, ону сэргэ улууспутугар Аҕам саастаахтарга ытыктабыл сылынан олимпийскай эрэллэри бэлэмниир оскуола манеһыгар улуус киин балыыһатын медицинскэй сиэстэрэлэрин күрэһэ ыытылынна. Ол курдук, терапия отделениета «Адреналин», поликлиникаттан «Аанньаллар», хирургия отделениета «Скальпель», реанимация уонна интенсивнай отделениелар холбоһуктаах хамаандалара, оҕо отделениета «Дружба», оҕо консультациятыттан «Люди в белом», Кутана, Элгээйи, Тойбохой врачебнай отделениелара барыта тоҕус хамаанда алта түһүмэхтээх сорудахтары толордулар.
Бэрт интэриэһинэн, эрийсиилээх күрэстэһии түмүгүнэн кыайыылаах хамаанданан хирургическай отделение буолла. Иккискэ реанимация, интенсивнай отделениеларын хамаандата таҕыста. Үһүс бочуоттаах миэстэни Тойбохой врачебнай учаастага ылла. Кыайыылаахтар грамоталарынан наҕараадаланнылар. Ону сэргэ бастаабыт хамаанда 15 тыһ. солк., иккистээбиттэр 10 тыһ. солк., үһүстэр 8 тыһ. солк. суумалаах сэртипикээттэри туттулар.
Күрэс биир түһүмэҕинэн автоквест оонньуута этэ. Онно оҕо консультациятын хамаандата кыайыылаах буолла.
Тэрээһин үөрүүлээх аһыллыытыгар улуус киин балыыһатын кылаабынай бырааһа Анатолий Назаров бэйэтин эҕэрдэтин, махтал истиҥ тылларын медицинскэй үлэһиттэргэ эттэ. Таһаарыылаах үлэлээхтэргэ киин балыыһа Махтал суругун туттартааата.
Улуус баһылыгын аатыттан социальнай боппуруостарга исписэлиис Тамара Иванова, олохтоох дьаһалтаттан баһылык солбуйааччыта Федор Федоров уонна улуус кылаабнай медсиэстэрэтэ Саргылаана Герасимова эҕэрдэлэрин эттилэр, күрэхтэһээччилэргэ ситиһиини баҕардылар. Үлэлэригэр бэриниилээх, ситиһиилээх үрүҥ халааттаах аанньалларга улуус баһылыгыын, олохтоох дьаһалта грамоталарын туттартааатылар. Өр сыл доруобуйа харыстабылыгар үлэлии сылдьар медицинскэй сиэстэрэлэр Тойбохойтон Сардаана Данилова, хирургическай отделениеттан Анна Михайлова, поликлиникаттан Наталья Черепанова «Сунтааар улууһун социальнай-экономическай сайдыытыгар кылаатын иһин» бэлиэнэн наҕараадаланнылар.
Бу күн билиилэрин-көрүүлэрин, сатабылларын тургутуу күрэһэ олус тэрээһиннээхтик ыытыллыбытын кыттааччылаар бэлиэтииллэр.
Яина ВЛАСЬЕВА