Үрүҥ халааттаах аанньалларбар махтанабын

Бачча сааспар диэри балыыһаҕа сытан эмтэммэтэх киһи ыарыы обургу хам ылан улууһум терапия балыыһатыгар киирэн система, укуол ылан, эмп иһэн бэттэх кэлэн таҕыстым.

Балыыһа сэбиэдиссэйэ Светлана Саввична олус кыһаллыгас эмчитин манна киирэн эмтэнэн тахсар дьон бары этэллэр. Эмчит Валентина Степановна турукпун олус кичэйэн көрдө. «Суһал көмө» суоппара дьоҥҥо олус элэккэй, кыһамньылаах үлэһитин бэлиэтиэхпин баҕарарбын. Ол курдук, кини мин диагнозпын быһаартарарбар олус көмөлөстө. Аны туран балыыһаҕа сытан эмтэнэрбэр терапия отделениетын санитаркалара олус да бүөбэйдээтилэр. Сиэстэрэ кыргыттар быраас анаабыт укуолун, эмин кыһамньылаахтык биэрэн эмтээтилэр.

Дьэ бу курдук, балыыһа бары үлэһиттэрэ анал тустаах үлэлэрин толорон күнүстэри-түүннэри ыарыһах үтүөрэригэр кыһамньыларын ууран үлэлииллэр. Онон бу кыракый бэлиэтээһиним түмүгэр улуустааҕы терапия бары үлэһиттэригэр улахан да улахан махталбын тириэрдэбин. Эһиги үлэҕит мэлдьи сыаналаннын, ыарыһах махталын ыла туруҥ диэн этэбин, дьиэ кэргэҥҥитигэр этэҥҥэ буолууну баҕарабын.

 

Екатерина ИВАНОВА, Уһун Күөл нэһилиэгин бочуоттаах олохтооҕо, бэтэрээн учуутал, тыыл бэтэрээнэ 

Читайте дальше