Олоҥхо дойдута- Сунтаартан анаан кэлэн, күүтэн — күүтэн, көһүтэн — көһүтэн «Ыллаа 2» кэнсиэри көрдүм эбээт. Биир, икки киһи күүстэрин холбоон, сатабылларын салҕаан бүтүн куораты сэргэхситэллэр, үгүс дьоҥҥо умнуллубат түгэннэри, ҮӨРҮҮНҮ бэлэхтиир да буолаллар эбит. Юана, Вова Дормидонтов этэн тыынан, эҥсэн саҕалааттарын кытта сүүрүк ат тэппит атаҕын кубулуппатыныы биир тыынынан барда. Манна бааллар оҕолор, эдэрдэр, орто, аҕам саастаахтар: асчыттар артыыстар, блогердар, урбаанньыттар — үтүө, сырдык санаа үктэллээх үтүө дьоннор! Доруобуйаларынан хааччахтаах талааннаах дьоннору таба тайанан алгыстатан, ыллатан кэнсиэри олох атын — сылаас тыыннаата. Эр дьонноро БАРЫ чахчы эр киһилии көмүрүө, дорҕоонноох куоластаахтарыттан, дьоһуннук тутта- хапта сылдьалларыттан, ырыаларыгар сөп түбэһиннэрэн үҥкүүлээн өрө биэрэллэрин наһаа да астынныым. Оттон кыргыттар, ийэлэр, эбэлэр улахан кастины ааспыттар дуу диэхпэр дылы бииртэн биир кэрэлэрэ, иирэ талахтыы имигэстэрэ сөхтөрдөө. Онтон өйдөөбүтүм үчүгэйтэн үчүгэй — үөрбүт сирэй, кэрэттэн кэрэ — сырдык санаа сыдьаайа эбит! Бу да сырыыга куруук убаастыы, сөҕө, астына көрөр- истэр Фрументий Петровичпын бэлиэтээбэтэхпинэ сатаммат. Дьэ, бу баар — тарбаҕын төбөтүттэн дууһатын хас биирдии кылыгар тиийэ ырыанан миниспектакль курдук ырыаны көрөөччүгэ тиэрдэр, артыыстыы оонньоон ыллыыр улуу ЫРЫАҺЫТ!!! Тылын дэгэтигэр 95 сааһым диэбитин истэн мин үөрдүм. 95 сааһыгар кэнсиэргэ ханна да буолларбын кэлиэм диэн бүччүм санааны ылынным. 22 оҕону дьоллообут Павловтар кинилэргэ анаан суруйбут «Дьоллоох дьиэ кэргэн » хоһооммун ырыа гынан көтүппүттэрэ дьүрускэнэ, ырыаһыттара чахчы ис сүрэхтэн ыллыыр буоланнар түөспүн үөрүү киэптээтэ. Махтал .
Мария Сергеевна Семенова… Бу Ийэ, Кэргэн, көһөҥө Талаан, Иитээччи, Учуутал, Муусукаан, саха тылын биир киһи холугар күүскэ тарҕатааччы … Өссө да салгыы туруохха сөп. Убаастанар Учууталын, Иитээччитин чаҕылхай холобурунан куруук уҥа — хаҥас кынаттара, Юана , Анита, Дуолан, үөрэнээччилэрэ буолаллар. Тыһыынча көһү айаннаан кэлэн киэргэтэллэрэ бу элбэҕи этэр! Соҕотох Мария Сергеевна Туймаада туонатын олоҕун сэргэхситтэ, саҥа сүүрээн киллэрэн элбэх дьоҥҥо эрэли сахта, үөрүүлэрин үрдэттэ диэн дорҕоонноохтук этэбин, бу мин тулхадыйбат санаам. Ыытааччылар Юана, Вова күллэрэн, ардыгар Вова уутугар — хаарыгар киирэн аһара баран да ыллар( мин тус санаам — хас биирдии киһи үчүгэй эрэ өрүтүн чорботон бэлиэтиир киһини өссө урдүккэ көтүтэр , ордук маннык сырдык түгэннэргэ) бэккэ кыайа — хото туттулар.
Сырдык сыдьаайдаах, сылаас тыыннаах ураты күнү бэлэхтээбиттэргэ барҕа махтал!
Зинаида ФЕДОТОВА — ДЬОЛ КЫЫМА,
Сунтаар, суруйааччы