Былырыын биһиги өрөспүүбүлүкэбитигэр Үлэ сыла биллэриллэн, араас элбэх дьаһал, ыйаах тахсан, үлэ-хамнас ыытыллыбыта. Үлэһит дьон үгүстүк чиэстэммитэ.
Үгүс дьаһаллартан биирдэстэрэ өрөспүүбүлүкэбит Ил Дархана Айсен Николаев «Үлэ киһитэ» бириэмийэ олохтонорун туһунан дьаһала буолар. Бу дьаһал уопсастыба үлэһит дьону чиэстииригэр, үлэҕэ, үлэ дьонугар ытыктабыллаах сыһыаны олохтууругар туһуламмыта.
Саха Өрөспүүбүлүкэтин Ил Дарханын дьаһалынан, сыл ахсын өрөспүүбүлүкэ 50 олохтооҕор, өрөспүүбүлүкэ социальнай-экономическай сайдыытыгар кылааты киллэрбит үлэ бастыҥнарыгар бу бириэмийэни туттарыллар. Бириэмийэ суумата — 300 тыһыынча солкуобай.
Былырыын «Үлэ киһитэ» бириэмийэни өрөспүүбүлүкэ 50 туруу үлэһитэ ылбыта. Олор истэригэр биһиги улууспутуттан — икки киһи. Ол курдук, “СӨ ОДьКХ” ГУТ Сунтаар улууһун филиалын Күүкэйдээҕи учаастагын электросварщига Шмидт Егоров буолар. Кини бу сэдэх идэҕэ 30-ча сыл үлэлээтэ. Кини таһаарыылаах үлэтин СӨ Ил Дархана Айсен Николаев үрдүктүк сыаналаан, Үлэ сылынан олохтоммут Ил Дархан бириэмийэтин туттарбыта.
Иккис киһинэн пиэрмэр, улууска бэйэ оҥорон таһаарар бородууксуйаны дэлэтиигэ үлэлэһэр Станислав Семенов буолар. Станислав тыа сиригэр олохтоох бородууксуйаны дэлэтиигэ үгүс сыратын ууран үлэлиирин олохтоохтор билэллэр. Кини бэйэтэ оҕуруот аһын, бурдугу үүннэриннэн дьарыктанарын таһынан, улуус эдэр пиэрмэрдэригэр бэйэтин уопутуттан үллэстэр, кинилэргэ көмө оҥорор үтүө санаалаах чахчы туруу үлэһит киһибит.
Быйыл эмиэ Үлэ, саас бырааһынньыгын көрсө «Үлэ киһитэ» бириэмийэни өрөспүүбүлүкэ 50 киһитэ тутуоҕа. Олор кимнээх буолалларын бу сотору кэминэн билиэхпит.
Яина ВЛАСЬЕВА
Хаартыска интэриниэттэн ылылынна.