С.А.Зверев-Кыыл Уолун ытык дойдутугар Ыгыаттаҕа баар мемориальнай түмэл-тэлгэһэ улуу киһи олоҕун, айар үлэтин кэпсиир, билиһиннэрэр. Түмэл-тэлгэһэҕэ Сэргэй Сибиэрэп-Кыыл Уола олорбут дьиэтигэр кини тутта сылдьыбыт мала, таҥаһа-саба баар. Ону тэҥэ, туспа дьиэҕэ Сэргэй Сибиэрэп олоҕун, айар үлэтин, төрүттээбит ансаамбылын туһунан кэпсиир экспонаттары кэрэхсии көрүөххэ сөп. Туохха да тэҥнэспэт, сыаналаах экспонаттарынан оҕонньор дүҥүрэ, таҥаһа-саба көрдөрүүгэ турар.
Оҕонньор тэлгэһэтин аһаҕас халлаан анныгар түмэл диэн ааттыахха сөп. Улуу киһи төрөөбүт дойдутугар буолбут суолталаах түгэннэр, билигин история кэрэһиттэрэ буолбут экспонаттары көрдөрүүгэ тураллар. Ол курдук, Саха норуодунай суруйааччыта Наталья Михалева-Сайа аатырбыт «Уйгур» айымньытын сүрүн дьоруойун Уйгур тыыта бу түмэлгэ баарын элбэх киһи билбэтэ буолуо.
Бу күннэргэ С.А.Зверев-Кыыл Уолун холбоһуктаах түмэлин үлэһиттэрэ бэйэлэрин күүстэринэн түмэл-тэлгэһэҕэ сөргүтүү, өрөмүөн үлэтин ыыттылар. Түмэл дьиэтин ис барааныгар аныгылыы тыыны киллэрдилэр: анал трековай лаампалары ииллилэр, экспонаттар турар сирдэрин саҥардан биэрдилэр. Эбии тэлгэһэҕэ күөх газон тэлгиир баҕа санаалаахтар, уотун-күөһүн уларытыахтара. Онтон оҕонньор дьиэтигэр экспонаттары күн уотуттан харыстыыр, хаххалыыр жалюзилары оҥордулар. Бу курдук, кыра да буоллар түмэлгэ сөргүтүү үлэтин ыыттылар. Аны сайын Сибиэрэп-Кыыл Уолун 125 сылын бэлиэтиир үрүҥ тунах ыһыахха Ыгыатта түмэлэ ыраахтан-чугастан ыалдьыттары күүтэр.
Мира АФАНАСЬЕВА
