Сунтаардааҕы политехническай лиссиэй интэринээтигэр саҥа киирбит оҕолорго аналлаах сылын аайы ыытыллар тэрээһин буолла.
Быйыл араас нэһилиэктэн барыта 13 иитиллээччи эбии киирдэ, ол иһигэр 7 оҕо 5-с кылаас үөрэнээччилэрэ.
Хайы-үйэ үөрэх саҕаламмыта икки ыйтан орунна, оҕолор бэйэ-бэйэлэрин кытта үчүгэйдик билсэн, доҕордоһон, тэрилтэ бэрээдэгэр үөрэнэн, биир дьиэ кэргэн курдук турукка киирэ сылдьаллар.
Тэрээһиҥҥэ оҕолор бэйэлэрин билиһиннэрдилэр, талааннарын көрдөрдүлэр. Бу күн оҕолорго олус күүтүүлээх.
Сылын аайы оҕолор саамай күүтэр ыалдьыттара лисиэйбит дириэктэрэ Олег Сосин буолар. Иитиллээччилэр үчүгэй таһымнаах кэнсиэр көрдөрдүлэр. Ырыа ыллаатылар, чабыргахтаатылар, хомуска оонньоон дьырылаттылар, оллоонноон олорон олоҥхолоон да ыллылар. Бүтэһигэр оһуокайдаан ойдулар.Киһи көрө үөрэр, оҕолор барахсаттар талааннарыттан.
Олус долгутуулаах түгэнинэн, аныгы сибээс көмөтүнэн, илэ көстөн олорон, ыраах Казахстантан уонна Дьокуускай куораттан ХИФУ-га үөрэнэ сылдьар интэринээт былырыыҥҥы иитиллээччилэрин эҕэрдэлэрэ буолла.
Уолаттар үөрэммит лиссиэйдэригэр, интэринээт иитээччилэригэр махтаннылар уонна оҕолорго туһаайан, үчүгэй үөрэҕи уонна бэрээдэги баҕардылар, үчүгэй идэни талан инники араас сиргэ үөрэниэххит диэн эрэнэллэрин туһунан эттилэр.
Саҥа киирбит иитиллээччилэргэ хаалтыс баайыытынан уонна оҕолор үчүгэйдик үөрэниэхпит, тэрилтэ бэрээдэгин барытын тутуһуохпут диэн андаҕардарынан үтүө тэрээһин түмүктэннэ.
Альбина ПРОКОПЬЕВА
Интернат иитээччитэ.