Г.Е. Бессонов аатынан Тойбохой орто оскуолатыгар «Зарница 2.0» байыаннай-патриотическай оонньуу муниципальнай түһүмэҕэ ыытылынна. Барыта 13 хамаанда, 130 үөрэнээччи кытынна.
Күрэхтэһии үөрүүлээх аһыллыытыгар Тойбохой нэһилиэгин баһылыгын солбуйааччы Айаал Леонтьев, Сунтаар улууһун үөрэҕин салалтатын салайааччыта Борис Васильев, Тойбохой оскуолатын дириэктэрэ Айаал Тотонов, Бүтүн Арассыыйатааҕы оҕо уонна ыччат хамсааһына «Бастыҥнар хамсааһыннара» олохтоох салаатын бэрэссэдээтэлэ Мария Егорова эҕэрдэ тылларын эттилэр, кыттааччыларга күүһү-уоҕу, ситиһиилэри баҕардылар.
Ураты түгэнинэн Юнармеецтар кэккэлэригэр киирии сиэрэ-туома буолла. 90 эдэр патриот төрөөбүт дойдуларыгар итэҕэллээх, үгэстэрин тутуһарга уонна саастыылаахтарыгар холобур буоларга эрэллэрин биллэрдилэр.
Сэрэбиэй кэнниттэн строевой хаамыы көрүүтэ ыытылынна. Ону кытта араас уобаластарга бастыҥнары быһаарар кэккэ түһүмэхтэр ыытылыннылар. Ол курдук, хамандыырдар бэйэлэрин кыахтарын, билиилэрин, оттон политруктар үөрүйэхтэрин көрдөрдүлэр. Таһырдьа инженер-сапердар миинэ көрдөөһүҥҥэ күрэхтэстилэр. Военкордар оперативнай репортажтары оҥорууга, медиктэр уонна штурмовиктар успуорт саалаҕа бастакы көмөнү оҥорууга уонна мэһэйи туоратыыга күрэхтэстилэр.
Ону таһынан «Огневая подготовка» түһүмэххэ сатабылларын көрдөрдүлэр. Биир саамай тутаах түһүмэҕинэн хамаанданан түргэн тэтимнээхтэрин көрдөрөр «Военизированная эстафета» буолла.
Тыҥааһыннаах күн кэнниттэн «Зарница 2.0» кыайыылаахтара ааттаннылар. Дохсун ытыс тыаһынан, бастыҥ хамаандалар уонна кыттааччылар бочуоттаах наҕараадалары, дипломнары ыллылар.
Ол курдук, үһүс миэстэҕэ Кутана орто оскуолатын хамаандата таҕыста, иккис — Бордоҥ орто оскуолатын хамаандата. «Зарница 2.0» кыайыылааҕынан Сиэйэ орто оскуолатын хамаандата буолла.
Тэрээһин үөрэнээччилэри доҕордоһууга, хамаанданан тыыны бөҕөргөтүүгэ уонна, биллэн турар, Ийэ дойдуга бэриниилээх буоларга, бэрээдэккэ, эппиэтинэскэ иитээһиҥҥэ улахан суолталаах.
Улуустааҕы үөрэҕирии салаатын пресс-сулууспата