Бэҕэһээ Дьаархан «Дьулуур» успуорт манеһыгар саха төрүт оҕунан ытыытыгар «Байанай бэлэҕэ» диэн ааттаах улуустааҕы турнир ыытылынна. Бу тэрээһин өрөспүүбүлүкэбитигэр биллэриллибит Оҕо саас сылыгар ананна. Сунтаар улууһугар икккис төгүлүн ыытыллар күрэхтэһиигэ 2007-2010 сс. төрүөх саастаах оҕолор кытыннылар.
Күрэспит аһыллыытыгар, Сунтаарга оҕунан ытыы тириэньэрэ Ньургуйаана Петрова эҕэрдэ тылын кэлбит күрэхтэһээччилэргэ анаата, оҕунан ытыы кистэлэҥнэрин кэпсээтэ.
Дьаархан орто оскуолатын дириэктэрэ Николай Охлопков оҕунан ытыыны олус өйүүрүн, биһириирин биллэрэн туран, ким ордук бэлэмнээх, элбэх дьарыктаах ол кыайдын диэн баҕа санаатын эттэ.
Күрэспит кыргыттар ытыыларынан саҕаланна. Бастаан «куобаҕы», онтон «куһу» уонна «тииҥи» ытыалаатылар. Күрэспит өрөспүүбүлүкэтээҕи «Байанай бэлэҕэ» күөн күрэс быраабылатын толору тутуһан ыытылынна. Кыргыттар 20 м, уолаттар 25 м ыттылар.
Күөн күрэспит кыайыылаахтарынан кыргыттарга буоллулар: Маркова Күндүлээнэ, Дьаархан – I м., Семенова Айыына, Дьаархан – II м., Лукина Нелли, Сунтаар гимназията – III м.
Уолаттарга: Потапов Владимир, Маар Күөл – I м., Сидоров Павел, Сунтаар, — II м., Иванов Кэскил, Дьаархан – III м.
Бары кыайыылаахтар туоһу суругунан уонна түөскэ кэтэр мэтээлинэн наҕараадаланнылар.
Дьаархан нэһилиэгиттэн анал байыаннай дьайыы бэтэрээнэ, хомойуох иһин ол сэриигэ ылбыт ыарахан бааһырыытыттан биһиги кэккэбититтэн туораабыт Иван Павлов-Саллыы аатынан кини ийэтэ Светлана Николаевна, аҕата Анатолий Дмитриевич Павловтар туруорбут анал бириистэрин Семенова Айыына (Дьаархан) ылан үөрдэ.
Оҕунан ытыы күрэҕин кэннэ муҥутуур кыайыылааҕы быһаарар ытыылар буоллулар. Бэйэтигэр уонна оноҕоһугар эрэллээх 14 оҕунан ытааччы суруйтаран кытынна.
Сэрэбиэй түмүгүнэн иккилии буолан «утарылаһааччыгын» кыайаҥҥын үөһээ тахсан иһиэхтээххин. Хотторбут тута көрөөччү буолан иһэр. Бииртэн биир ытааччылар хотон үөрдүлэр даҕаны, хотторон хомойдулар даҕаны. Финалга Сунтаар улууһун киэн туттар спортсмена, 2023 сылга «Дыгын оонньууларын» кыттыылааҕа, быйылгы оонньууларга эмиэ күүстээх сүүмэрдиир күрэстэри ааһан кыттыахтаах Алексей Соколов уонна мин бу сурук ааптара Павел Кырелов таҕыстыбыт. Эриһиилээх ытыылар кэннилэриттэн кыайыыны Алексей Соколов ылла уонна туоһу суругу тутта, мэтээл кэттэ.
Алексей бу күрэххэ анаан-минээн оҕунан ытан эрчиллээри, атах оонньууларыгар ыстанан көрөөрү кэлэн күрэхтэһиибитин олус киэргэттэ. Алексейга быйылгы «Дыгын Оонньууларыгар» кыайыыны, хотууну баҕарыаҕын.
Күрэхтэһии кэнниттэн кэлбит дьоҥҥо Сунтаар улууһун оҕунан ытыыга тириэньэрэ Ньургуйаана Петрова, улууспут биир күүстээх ытааччыта Наталья Федорова маастар-кылаас биэрдилэр.
Павел КЫРЕЛОВ, күрэхтэһии тэрийээччитэ, судьуйата.