Быйылгы үөрэх дьылын көрсө Сунтаардааҕы «Арассыыйа Ийэлэрэ» хамсааһын «Собери ребенка в школу» диэн үгэс быһыытынан сылын аайы тэрийэр үтүө санаа аахсыйатын ыытта. Бу курдук улууспут ийэлэрин түмсүүлэрэ сылын аайы элбэх оскуолаҕа үөрэнэр оҕолоох, уустук балаһыанньаҕа түбэспит, намыһах дохуоттаах, о.д.а дьиэ кэргэҥҥэ оҕо оскуолаҕа барарыгар туһааннаах көмөнү оҥороллор. Ол сиэринэн быйыл эмиэ бу үтүө санаа аахсыйата көхтөөхтүк ыытылынна.
Сунтаарга
Сунтаардааҕы «Арассыыйа Ийэлэрэ» хамсааһын күһүҥҥү үлэтин саҕалаата, ол курдук сылын аайы буолар «Собери ребёнка в школу» диэн аахсыйанан 5 оҕолоох Тихоновтар дьиэ кэргэҥҥэ ( бу сайын олорор дьиэлэрэ олоччу уокка былдьаммыта) кинилэр икки оскуолаҕа үөрэнэр оҕолоругар көмө диэн 7000 солк. суумалаах үөрэнэргэ наадалаахтарын ылыналларыгар диэн сэртипикээттэри туттардыбыт.
Сунтаардааҕы «Арассыыйа Ийэлэрэ» түмсүү, «Собери ребёнка в школу» диэн сылын аайы буолар аахсыйанан иккис ыалга көмө оҥордубут, ол курдук Наумовтар диэн элбэх оҕолоох ( оскуолаҕа 8 оҕо үөрэнэр, ийэлэрэ инбэлиит) ыалга 7000 солк. суумалаах көмө туттардыбыт.
Дария Григорьева.
Бүлүүчээҥҥэ
Сунтаар улууһун, Бүлүүчээннээҕи «Арассыыйа ийэлэрэ» түмсүү Билии бырааһынньыгын көрсөр үөрүүлээх тэрээһиҥҥэ «Собери ребёнка в школу» аахсыйаҕа кыттыһан, 1-кы кылааска киирбит кырачаан оҕолорбутугар: Глухарёва Аделинаҕа, Коркин Владимирга, Терентьева Виталинаҕа кинигэ уонна «Книжный маркет» маҕаһыын сэртипикээтин бэлэх ууннубут.
Мария Барамыгина.
Кириэстээххэ
Сунтаар улууһун Кириэстээх нэһилиэгин «Арассыыйа Ийэлэрэ» түмсүүтэ «Портфель добра» аахсыйаны тэрийэн, быйыл 1-кы кылааска киирэр 5 оҕоҕо: Григорьев Мишаҕа, Самсонов Сайааҥҥа, Николаева Илонаҕа, Конобулова Сандаараҕа, Филиппова Алгыстаанаҕа үөрэх тэрилин туттартаатыбыт. Быйыл 1-кы кылааска 14 оҕо киирэн, оскуола боруогун атыллаата.
Саргылана Григорьева.
Элгээйигэ
Сунтаар улууһун Элгээйитээҕи «Арассыыйа Ийэлэрэ» салаатын түмсүүтэ Билии күнүн көрсө «Собери ребёнка в школу» аахсыйаҕа кыттыhан, элбэх оҕолоох соҕотох аҕаҕа Аввакумов Евгений Еремеевичкэ «Корона» маҕahыынтан үөрэх тэрилин ылыналларыгар сэртипикээт бэлэх уунна. Ситиhиилээх үөрэх сыла буоллун диэн баҕа санаабытын этэбит.
Оксана Яковлева.
Сиэйэҕэ
Сиэйэтээҕи «Арассыыйа Ийэлэрэ» түмсүү көҕүлээһининэн нэһилиэк тэрилтэлэрэ, түөлбэлэрэ, «Собери ребёнка в школу» аахсыйаҕа кыттыһан, 1-кы кылааска киирбит 8 оҕоҕо үөрэх тэрилин бэлэхтээтилэр.
Антонина Иванова.