Ахсынньы 8 күнүгэр Сунтаарга СӨ үөрэх уонна наука миниистирэ Ньургууна Соколова салайааччылаах бөлөҕө үлэлээтэ. Бөлөххө СӨ иитии-үөрэтии уонна эбии үөрэхтээһин эйгэтигэр судаарыстыбаннай бэлиитикэ департаменын салайааччыта Надежда Захарова, С.Н. Донской-II аатынан үөрэх сайдыытын уонна квалификацияны үрдэтэр институтун дириэктэрин солбуйааччы Светлана Дедюкина буолан сырыттылар.
Миниистир улуус баһылыга Анатолий Григорьевы кытта көрсөн үөрэх хаачыстыбатын, сайдыытын туһунан сэһэргэстилэр.
Ол кэннэ үөрэх эйгэтин салайааччыларыгар сүбэ мунньах ыытта. Бу манна үөрэх хаачыстыбатын үрдэтии, иитии-үөрэтии, эбии үөрэхтээһин, оҕо сайыҥҥы сынньалаҥа, үөрэх тэрилтэтигэр аһылык, 9-с кылаас кэннэ аттестат кыайан ылбат түгэннэрэ тахсарын, профориентационнай үлэҕэ болҕомтону ууруу о.д.а. кэккэ боппуруостар тула кэпсэттилэр. Туох, ханнык кыһалҕалар баалларын дьүүллэстилэр.
Маны сэргэ куйаар ситимин нөҥүө министиэристибэ үлэһиттэрэ, институт, киин салайааччылара, исписэлиистэрэ кытыннылар. Туһааннаах ыйытыктары биэрдилэр. Улууспутугар үөрэҕирии эйгэтэ сайдарыгар баар харгыстары ырытан, ону туоратарга кэккэ сүбэлэри биэрдиэр.
Салгыы бөлөх Сунтаардааҕы технологическай колледжка быйыл күһүн үлэҕэ киирбит мастарыскыайы көрдүлэр. Мастарыскыайга устудьуоннар практическай дьарык ааһан, үөрэх бүтүүтүгэр үлэҕэ бэлэм квалифицированнай идэлээх үлэһит буолан тахсалларыгар бэрт усулуобуйа олохтоммутун көрдүлэр.
Онтон Сунтаардааҕы политехническай лиссиэй эбийиэгин тутуутугар сырыттылар.
Алена ИВАНОВА