Бэҕэһээ Б.Г.Игнатьев аатын сүгэр Дьаархан орто оскуолатын 4 с кылааһын үөрэнээччилэрэ ыаллыы сытар Леонид Попов аатын сүгэр Арыылаах орто оскуолатын 4-с кылааһын үөрэнээччилэрин кытары доҕордуу көрсүһүүтэ тэрилиннэ. Оҕолордуун билсэн, дуоһуйа күрэхтэһэн, икки этээстээх таас оскуоланы,успуорт саалатын көрөн-истэн кэллибит.
Успуорт үс көрүҥэр күрэстэстибит. Хамаанданан «Пионербол» оонньууга олохтоохтор 2 — 1 ахсаанынан кыайдылар, «Баскетэстафета» оонньууга 2 — 0 ахсаанынан эмиэ уһун күөллэр кыайан үөрүүлэрэ үксээтэ. Дьаархан оҕолоро хаһан успуорт саалатыгар сылдьыбыттара баарай бэйэбит спортзалбыт аварийнай туругунан сабыллыбыта уонтан тахса сыл буоллаҕа… Хата оҕолорбут дуоһуйа мээчик тутан, быраҕан олус астыннылар.
Үһүс көрүҥмүтүгэр — нуучча дуобатыгар биирдии уол уонна кыыс оонньоотулар. Биһигиттэн Эрсан Степанов уонна Вера Егорова үс партияҕа кииристилэр, ол гынан Эрсан 0 : 2, Вера 2 : 0 оонньоотулар. Онон бу көрүҥҥэ тэҥнэһэн таҕыстыбыт.
Үс көрүҥ түмүгүнэн Арыылаах орто оскуолатын үөрэнээччилэрэ хотоннор, Дьаархан орто оскуолатын иһинэн тэриллибит «Дьулуур» спортивнай кулууптан Туоһу сурук туттулар уонна Дьаархан «Дьулуур» успуорт манеһыгар сүүрэ-көтө, күрэхтэһэ кэлиэх буоллулар.
Бу табаарыстыы көрсүһүүбүт иккис сыалынан — оҕону патриотическай тыыҥҥа уһуйуу буолар. Ол курдук, бары билэрбит курдук, Арассыыйа уонна Донецскай норуодунай өрөспүүбүлүкэ Дьоруойа үрдүк аатын сүкпүт Дмитрий Егоровка аналлаах истиэндэни уонна киниэхэ анаммыт «Дьоруой паартата« диэн бочуоттаах миэстэни ылан турар муннукка сырыттыбыт. Кини туһунан Арыылаах орто оскуолатын физическэй культуураҕа учуутала Никифор Павлович кэпсээнин чуумпуран туран, долгуйа, харааста иһиттибит. Бүтэһигэр Дьоруой паартатын таһыгар өйдөбүнньүк хаартыскаҕа түстүбүт.
Бу сырыыбыт сыалын-соругун толору ситтэ, оҕолорбутугар олус туһалаах күн ааста.
Үөрэнээччилэр уонна тус бэйэм ааппыттан Арыылаах орто оскуолатын физическэй культуураҕа учууталыгар Никифор Петровка барҕа махтал тылларын этэбит.
Павел КЫРЕЛОВ, Дьаархан орто оскуолатын физическэй культуураҕа учуутала