Владимир Павлов аатынан Сунтаардааҕы алын сүһүөх оскуолата тэриллэн үлэлээбитэ 35 сылын бэлиэтээтэ. Бастаан оскуола 1989с. Сунтаар 1№-дээх оскуолатыттан алын сүһүөх кылаастара туспа үөрэх тэрилтэтэ буолан барбыттара. Бу кэмтэн саҕалаан оскуоланы 7000 кэриҥэ үөрэнээччи бүтэрэн орто сүһүөх оскуолаларга үөрэнэ тарҕастылар. Биллэн турар, оҕоҕо үөрэх бастакы оҥкулун алын сүһүөх кылааһын билиитэ биэрэр. Ол иһин, алын сүһүөх үөрэхтээһинэ киһи сайдыытыгар улахан суолталаах.
Оскуола биллэр судаарыстыбаннай, бэлитиичэскэй диэйэтэлэ Владимир Гаврилович Павлов аатын сүгэр. Оскуола бэлиэ сыла Владимир Павлов төрөөбүтэ 95 үбүлүөйдээх сылыгар сөп түбэстэ. Билигин оскуола федеральнай государственнай үөрэх ыстандаарт ирдэбилинэн «Сайдыы.Үөрэтии.Бииргэ үлэлээһин.Айымньылаах үлэ» диэн тосхолу ылынан үөрэнээччи, учуутал, төрөппүт бииргэ үлэлээн, эйэҕэс сыһыаны олохтоон- олоххо толору бэлэмнээх, ситиһиилээх оҕону иитэн-үөрэтэн таһаараллар. Бу маннык үлэ түмүгүнэн учууталлар, оҕолор үрдүк ситиһиилэннилэр. Өрөспүүбүлүкэ бастыҥ оскуолаларын ахсааныгар киирдилэр.
Алын сүһүөх оскуолата бэлиэ күнүн уратытык атаарда. Ол курдук, тэрээһиннэр бу ый устата бардылар. Оскуолаҕа бастыҥ үөрэнээччилэр, выпускниктар, Владимир Павловка, оскуола маҥнайгы дириэктэригэр А.Г.Захаровка аналлаах истиэндэлэр арылыннылар. Үөрүүлээх тэрээһиҥҥэ кэлбит ыалдьыттары оҕолор ыйан-кэрдэн оскуола иһинэн экскурсия олохтоотулар. Хас биирдии истиэндэҕэ тохтоон элбэх интэриэһинэй чахчылары кэпсээтилэр. Онтон учууталлар аһаҕас уруок ыыттылар. Буоларын курдук мэлдьи үлэлэригэр айымньылаахтык сыһыаннаһар учууталлар «Норуотум үгэстэринэн айан», «Арай мин аптаах буолуум», «Барытын кыайыам», «Билии дьаарбаҥката» уо.д.а.уруоктары ыыттылар. Бииртэн биир, ураты, оҕо үлэлиир, билиини иҥэринэр эйгэтин үөскэтэр уруоктары ыалдьыттар сэҥээрэ көрдүлэр. Ону тэҥэ, оскуола иһинэн үлэлиир дьарыктары билиһиннэрдилэр. Оҕо сайдарыгар, билиитэ-көрүүтэ кэҥииригэр, төрөөбүт дойдутун таптыырга, ытыктыырга туһуламмыт дьарыктарга оҕолор сөбүлээн дьарыктаналларын, сайдалларын көрдүбүт.
Сибиэрэп киинигэр учууталлар, үөрэнээччилэр айар талааннарын, дьоҕурдарын көрдөрөр киэһэлэрэ эмиэ олус сэргэхтик ааста.
Мира АФАНАСЬЕВА
