Бу кэмнэргэ тыа сирин дьоно олус түбүктээх кэмнэрэ. Холобур, тэлгэһэттэн ууну ыытыы, ыраастаныы курдук үлэ дьиэ кэргэнинэн күргүөмүнэн ыытыллар.
Тэрилтэлэргэ эмиэ сүрдээх эппиэттээх күн турар. Быйыл кыһын хаар халыҥ буолан, сир-дойду уунан туолла. Улуус, олохтоох дьаһалталар бу сааскыттан ууну ыытыыга улахан кээмэйдээх үлэни ыыттылар. Манна элбэх тэрилтэ, биирдиилээн дьон көмөҕө тахсан, билигин сир ууттан босхолонон эрэр, арыый кууран эрэр. Ол эрээри ойуурга үрэхтэр уулара толору турар диэн этэллэр.
Бу күннэргэ Ыылаахтан уонна ойууртан уу тоҕо анньан кэлэн Абаҕа күөлэ таһынан баран ыксата сырытта. Манна олохтоох дьаһалта уонна «Сунтар» МАУ тэрилтэ үлэһиттэрэ ууну түһэриигэ үлэлии сылдьаллар. Кинилэргэ улахан көмөнү оҥорон, улуус дьокутаата, «Сунтаравтодор» үлэһитэ Сергей Тен экскаватор биэрэн Абаҕаттан барар хорууну кэҥэтэн, дириҥэтэн биэрдилэр. Манна коррекционнай оскуола үлэһит эр дьоно, тыраахтырдаах Юрий Окс, бу түөлбэ олохтоохторо үлэҕэ кыттыстылар.
Яина ВЛАСЬЕВА