Сунтаар улууһун Хаданын олохтооҕо талба талааннаах уран уус Иннокентий Иванов сылын ахсын Саҥа дьыл бырааһынньыгын көрсө хаар оҥоһук эгэлгэтин оҥорон дьону-сэргэни сөхтөрөрүн билэбит. Тигр сылыгар анаан оҥорбут оҥоһугун 1,5 тыһ киһи, былырыыҥҥы Айыыһыт Хотуннаах композицияны 2,5 тыһ. киһи кэлэн көрбүт. Кини саҥа сылы көрсө, оҕолор, сиэннэр, дьон-сэргэ үөрдүн-көттүн, кэлэн көрдүн диэн үтүө санаанан салайтаран оҥоһуктарын оҥорор.
Оттон быйыл кини хаарынан оҥоһугар тугу айан-тутан, чочуйан таһаарыай? Тымныыны тымныы диэбэккэ Иннокентий Петрович 2025 сыллааҕы оҥоһугун номнуо оҥорон саҕалаабыт. Хаары кытта киирсии сылаалааҕын, түбүктээҕин, ону тэҥэ хаар аҕыйаҕа күчүмэҕэйдэри үөскэтэрин бэлиэтиир.
«2025 сыллааҕы хаар оҥоһук кыһыллыбыта 2-с күнэ. Быйыл хаар элбэҕэ суох буолан 5 күн кутуллубут. Дьэ туох, хайдах буолан тахсарын көрөн истэн иһиэхпит. Бастакы видеоны, биллэрин курдук, кылгас кэпсэтииттэн, санаа үллэстиититтэн саҕалаатым. Аҕам бу оҥоһук кэнниттэн «үтүлүкпүн оскуомаҕа ыйыырым буолуо» диэтэ..”, – диир Иннокентий төрөппүт уола.
Алена ИВАНОВА