Бүгүн, алтынньы ый 16 күнүгэр, П.Х. Староватов аатынан Элгээйи орто оскуолатыгар ыытыллыбыт үөрүүлээх линейкаҕа баһаары умуруорууга хорсун быһыыны оҥорбут 11 «а» кылаас үөрэнээччитин Вадим Иванову чиэстээтилэр. Манна Сунтаардааҕы баһаарынай чаас начальнига Клим Наумов анаан тахсан хорсун санаалаах үөрэнээччигэ махтал суругу, өйдөбүнньүк бэлэҕи туттарда. Ону тэҥэ Вадимы ОБЖ уруогар уһуйбут учууталыгар Семенов Александр Николаевичка махталын биллэрдэ.
Бу түгэни санатар буоллахха, иэдээн буола сыспыт балаҕан ыйын 29 күнүгэр Вадим, күннэтэ буоларын курдук, киэһэлик оскуолаттан бүтэн дьиэлээн испит. Ол баран иһэн УАЗ массыына капотун иһиттэн хойуу буруо тахсарын көрөн, уолуйан турбакка, сүүрэн тиийэн дьоҥҥо көмөлөһөн баһаары умуруорсубут. Манна Вадим оскуолаҕа ОБЖ уруогар үөрэппит билиитэ улаханнык көмөлөспүт.
Вадим Иванов – «Патриот» байыаннай-патриотическай кулууп чилиэнэ, оскуола юнармеецтарын этэрээтин хамандыыра, улууска ыытыллыбыт «World skills Junior» прикладной куоҥкурус «Спасательные работы» компетенциятыгар чөмпүйүөнэ.
“Сунтаар сонуннара” хаһыат