От ыйын 11 күнүнээҕи туругунан Сунтаар улууһун территориятыгар 3 сиргэ баһаары бохсорго күүстээх үлэ барар. Сезон саҕаланыаҕыттан ойуур баһаара 11 сиргэ тура сылдьыбыт. Онтон 8-һа ликвидацияламмыт.
Ол курдук, 8-с нүөмэрдээх баһаар Түбэй нэһилиэгиттэн 67,4 км тэйиччи сиргэ баар. Уот турбута от ыйын 6 күнүгэр көстөн билигин онно уот киэҥ сиринэн тэнийбэтин бохсорго күүстээх үлэ барар. Манна билиҥҥитэ парашютнай-баһаарынай сулууспаттан — 6, баһаары утары судаарыстыбаннай сулууспа этэрээтиттэн (ОГПС) — 6, мобилизованнай олохтоох дьонтон 5 киһи үлэлииллэр.
Сунтаар улууһун баһылыгын 1-кы солбуйааччыта Николай Александров иһитиннэрэринэн, ойуур баһаара толору эргитиллэн, ааспыт түүн уоту утары уот ыытыллан, былаан быһыытынан 12 чыыһылаҕа бу баһаар бохсуллуохтаах (локализацияланыахтаах).
10-с нүөмэрдээх Бордоҥ нэһилиэгиттэн 93,7 км тэйиччи баар ойуур баһаарыгар уоту умуруорууга парашютнай-баһаарынай сулууспаттан, ойуур охранатыттан, ГАУ «Якутлесресурс» тэрилтэттэн, Сунтаардааҕы ИГЭН — 13 киһи уонна 17 мобилизованнай үлэлииллэр.
Николай Александров:
— Бу 10-с нүөмэрдээх баһаар алларанан 130 гаа ойуурунан, 20 гаа ойуура суох сиринэн тарҕанан умайар. Уот турбут сирэ соҕуруулуу-илининэн эргитиллэн, аны арҕаа кырыытыгар үлэ барар, минерализованнай балаһа ууруллар. Бүгүн манна бөртөлүөтүнэн эбии 9 киһи уоту умуруорууга тиэрдилиннэ.
11-с нүөмэрдээх Бордоҥ нэһилиэгиттэн 45 км ыраах сиргэ баар ойуур баһаарыгар билиҥҥитэ 31 умуруорааччы үлэлиир. Манна 67 гаа ойуур, 10 гаа ойуура суох сир кытарарга ылларан турар. Баһаары бохсууга МТЛБ, ГАЗ тиэхиньикэлэр үлэлииллэр.
— Манна минерализованнай балаһаны ууруу, сылбахтары эрбээһин, уунан ыһыы, о.д.а. уоту умуруорарга үлэ ыытыллан, баһаар кырыыта кэтээн көрүүгэ турар, ойуур баһаарын хоту өттүгэр күөдьүйүөх уоту ситэри умуруорарга бөлөх барда. Бу баһаар сарсын бохсуллара (локализация) былааннанар,- диэн Николай Павлович бүгүҥҥү балаһыанньаны билиһиннэрэр.
Марфа ИВАНОВА