Сэтинньи 9 күнүгэр С.А Зверев-Кыыл Уолун аатынан улуустааҕы норуот айымньытын киинигэр Олоҥхо ыйын үөрүүлээх аһыллыыта буолла.
Бу киэһэ дьон-сэргэ өрөспүүбүлүкэҕэ биллэр, талааннаах олоҥхоһуттар, биһиги биир дойдулаахтарбыт Наталья Эконова “Көҕөн Кус Уола Күн Ньургун бухатыыр», Александра Яковлева «Оҕо Тулаайах бухатыыр», Айсен Фёдоров «Дьырыбына Дьырылыатта бухатыыр», Ефрем Афанасьев «Кулдус бөҕө» олоҥхолорун үүттээх чэй иһэ-иһэ астына, дуоһуйа иһиттилэр.
Тэрээһиҥҥэ Сунтаар 3 №-дээх оскуолатын 2-с кылааһын үөрэнээччилэрэ кытыннылар уонна кырачаан истээччилэринэн буоллулар. Тэрийээччилэр саха мааны аһынан — саламааттаах алаадьынан ыалдьыттары күндүлээтилэр. Олоҥхону көрбут эрэ дуоһуйда, истибит эрэ сэргээтэ, астынна.
Олоҥхо ыйа сэтинньи 30 күнүгэр диэри ыытыллар. Бүгүн Илимниир нэһилиэгэр «Муҥха олоҥхото» диэн тэрээһинэ буолар. Манна бастаан оскуола үөрэнээччилэрэ олоҥхо истиэхтэрэ, ол кэннэ эбэҕэ киирэн муҥхалыахтара. Ый устата улуус оскуолаларыгар олоҥхоҕо аналлаах тэрээһиннэр ыытыллыахтара.
Дмитрий ЫМЫЧАНОВ