2023 с. олунньуга буолбут СӨ Тырааныспарга уонна суол хаһаайыстыбатын министиэристибэтин кэллиэгийэтин мунньаҕар улууспут Аҕа баһылыга Анатолий Григорьев нэһилиэнньэ туруорсар кыһалҕаларыгар, итиэннэ дьон олоҕо тупсарын туһугар кэккэ боппуруостарга этии киллэрбитэ. Ол курдук, улуус дьаһалтата уонна СӨ Тырааныспарга уонна суол хаһаайыстыбатын министиэристибэтэ ыкса ситимнээх үлэни ыытан, быйыл улууспутугар дьону таһар 5 саҥа автобус кэлбитэ.
Оттон бу автобустар Сунтаар сэлиэнньэтигэр сырыыларын туһунан Сунтаардааҕы АТП тэрилтэ дириэктэрэ Элина Яковлева маннык иһитиннэрэр: «Элбэх оҕолоох дьиэ кэргэттэр уонна анал байыаннай дьайыы кыттыылаахтарын оҕолоро Сунтаар иһигэр сүүрэр автобустарга босхо толуонунан сылдьаллар. Ол курдук байыастар оҕолоро дастабырыанньалаах буолаллара ирдэнэр. Оттон элбэх оҕолоох ыаллар 1-11 кылааска диэри үөрэнэр оҕолоругар оскуолаҕа тустаах сайабылыанньаны суруйан, «Алмазэргиэнбанк» тырааныспартнай каартатынан туһаныахтара. Маныаха, бүгүҥҥү күҥҥэ үбүлээһинин улуус дьаһалтата уйунан олорор. Автобустарга төлөбүрү ылар анал терминаллар сакаастанан, билигин барыта кэлэн сытар. Тырааныспарга уонна суол хаһаайыстыбатын министиэристибэтин реестрыгар икки маршрутунан сырыы олохтоммута. Ол курдук, Хомустаах-Бартыһаан уонна Химия-ПМК хайысхатынан сылдьар».
Санатан этэр буоллахха, элбэх оҕолоох дьиэ кэргэттэр оҕолорун босхо таһыы бэрээдэгэ «СӨ элбэх оҕолоох дьиэ кэргэттэргэ социальнай өйөөһүн эбии дьаһалларын туһунан» Ил Дархан Айсен Николаев ыйааҕынан бигэргэммитэ.
Елизавета ТИТОВА,
Хаартыска куйаар ситимиттэн ылылынна