Бүгүн, олунньу 7 күнүгэр, Л.А. Попов аатын сүгэр Сунтаар киин бибилэтиэкэтэ ааспыт үлэ сылын үтүө түмүктэрин таһаарар, ситиһиилээх үлэлээх исписэлиистэрин чиэстиир үгэс буолбут өрөгөй тэрээһинигэр үлэһиттэрин, доҕотторун муста. 2024 сыл Арассыыйаҕа Дьиэ кэргэн, Саха сиригэр Оҕо саас, Сунтаар улууһугар аҕам саастаахтарга ытыктабыл сыллара ааспыт буоллахтарына, Сунтаар кииннэммит библиотечнай ситимигэр Оҕо ааҕыытын сыла биллэриллэн, оҕо, дьиэ кэргэн ааҕыытыгар туһуламмыт элбэх араас хабааннаах үлэлэр ыытыллан, интэриэһинэй сыл ааста. Санаттахха, быйылгы сыл бибилэтиэкэлэргэ – Өйдөбүнньүк сыла.
Тэрээһин саҕаланыыта салайааччы Изабелла Жиркова ааспыт үлэ сылын бэлиэ түгэннэрин, үрдүк көрдөрүүлэрин, олоххо киирбит улахан бырайыактарын туһунан сырдатта. Бу үөрүүлээх күнүнэн улуус бибилэтиэкэрдэрин улуус аҕа баһылыгын социальнай уонна имиджевэй бэлиитикэҕэ солбуйааччыта Альберт Иванов, улуус култууратын уонна айылгытын салалтатыттан координационнай салаа сэбиэдиссэйэ Анна Трифонова истиҥ эҕэрдэлэрин эттилэр. Альберт Ионович: “Бибилэтиэкэ бу дьиэтигэр аан бастаан 5-с кылааска үөрэнэ сылдьан Марк Твен кинигэтин көрдүү кэлиэхпиттэн аанын саппатаҕым. Олус истиҥник, чугастык саныыр дьиэбэр кэлэн турарым олус долгутуулаах, үөрүүлээх. Эһиги ыытар үлэҕитин олус билэбин диирим, бу кэлэн көрөн-истэн элбэҕи да билбэккэ хаалар эбиппин дии санаатым. Оннук күүстээхтик, айымньылаахтык үлэлиир бибилэтиэкэлээхпитинэн киэн туттабын”, – диэн санаатын эттэ.
Салгыы төһө да кыараҕас, эргэ буоллар, үлэһиттэр бэйэлэрин күүстэринэн бырааһынньыктыы киэргэммит дьоҕус саалабытыгар кыһыл дорожка устун бииртэн биир кэрэ бибилэтиэкэр кыргыттар, дьоһуннаах уолаттар ситиһиилээх үлэлэрин туоһулуур анал ааттарын туоһу суруктарын туттулар, хаартыскаҕа хатаннылар. Үгэс быһыытынан номинаннарга тиэмэнэн арааран сибэкки дьөрбөлөөх эҕэрдэ суруктарын ыҥырыылаах ыалдьыттар, улууспут бас-көс ситиһиилээх дьоно, туттардылар.
Үгэскэ кубулуйбут сыл түмүктэрин таһаарар үөрүүлээх тэрээһиммит бастыҥнарын – наҕараадаламмыт кэллиэгэлэрбит өссө төгүл эҕэрдэлиибит, кинилэр ситиһиилэриттэн үөрэбит, кынаттанабыт, тэҥнэһэргэ дьулуһабыт. Кинилэр бары дойду, өрөспүүбүлүкэ, улуус таһымнаах күрэстэр кыайыылаахтара, ситиһиилээх кыттааччылара буолаллар.
Түгэни туһанан, бибилэтиэкэбит үлэтигэр куруук күүс-көмө буолар доҕотторбутугар, биир санаалаахтарбытыгар барҕа махталбытын биллэрэбит!
Марианна ПОСКАЧИНА, киин бибилэтиэкэ библиография уонна кыраайы үөрэтэр салаа үлэһитэ
Мария ТОМСКАЯ хаартыскаҕа түһэриилэрэ.