Быйыл нуучча улуу поэта Александр Сергеевич Пушкин төрөөбүтэ 225 сылын туолар. Бу бэлиэ күнү Бүтүн Арассыыйа үрдүнэн киэҥник бэлиэтиир туһунан дойду Бэрэсидьиэнэ Владимир Путин 2021 с. ыйаах таһаарбыта. Кэмпэндээйи бибилэтиэкэтэ нуучча тылын учууталларын уонна иитээччилэри кытары бу сылга «Улуу Пушкины ааҕабыт» диэн оҕолорго бырайыак үлэлэтэр былааннаах. Бастакы тэрээһин «Хаарчаана» уһуйаан улахан бөлөх оҕолоругар «Куобахчаан» ааҕыы кулуубун иһинэн ыытылынна. Бу күн кырачааннар Александр Пушкин олоҕун туһунан билистилэр. «Балыксыт уонна балык туһунан» остуоруйаны ойуутун көрдөрө-көрдөрө доргуччу ааҕан биэрдим. Оҕолор сөбүлээн иһиттилэр, түмүгэр кинилэр остуоруйаттан тугу өйдөөбүттэрин, санааларын ыйыттым. Бу ыйытыылар оҕо толкуйдуур, саҥарар дьоҕурун сайыннараллар уонна, биллэн туран, кинигэҕэ интэриэһи иҥэрэллэр.
Татьяна МЕСТНИКОВА
Видео Кэмпэндээйитээҕи бибилэтиэкэ сайтыттан ылылынна.