Билиҥҥи кэмҥэ саҥарар саҥатыгар кэһиллиилээх оҕо олус элбээтэ. Оҕо тыла сайдарыгар төрүөҕүттэн 6 сааһыгар диэри дьон тылын ылынара, иҥэринэрэ ордук тоҕоостоох кэм, бары өттүнэн толору сайдарыгар – төрөппүттэр уонна оскуола иннинээҕи үөрэхтээһин тэрилтэлэрэ биир сүдү сорукпут буолар.
Ол курдук, бүгүн сэтинньи 14 күнүгэр, Сунтаардааҕы 7-с нүөмэрдээх «Солнышко» оҕо сайдар киинигэр «Актуальные вопросы теории и практики логопедической помощи в дошкольных образовательных учреждениях в условиях реализации ФГОС ДО и ФОП ДО» диэн төрөппүттэргэ, иитээччилэргэ, логопедтарга анаан улуустааҕы семинар-практикум буолла.
Семинар сүрүн сыала, логопедтар, иитээччилэр уонна төрөппүттэр тылыгар кэһиллиилээх оскуола иннинээҕи саастаах оҕолору кытта үлэлиир таһымнарын үрдэтии буолар.
Манна Сунтаар араас нэһилиэктэриттэн уопсайа 42 исписэлиис, иитээччи уонна төрөппүт кыттыыны ыллылар.
Семинар арыллыытыгар Сунтаардааҕы үөрэҕирии салалтатын оскуола иннинээҕи салаа сүрүннүүр исписэлииһэ Надежда Павлова уонна «Солнышко» уһуйаан сэбиэдиссэйэ Изабелла Степанова педагогтар профессиональнай таһымнарын үрдэтиигэ уонна уопут атастаһыытыгар киэҥ хабааннаах тэрээһиннэри ыытыы суолтатын тоһоҕолоон бэлиэтээтилэр.
«Солнышко» уһуйаан психолога Нина Николаева психологическай тренинг ыытта.
Семинар чэрчитинэн араас көрүҥнээх маастар-кылаастар ыытылыннылар. Ол курдук,
«Нормы развития речи. Основные виды нарушений речи» Сунтаардааҕы 1 нүөмэрдээх «Туллукчаан» оҕо сайдар киинин логопеда Света Осипова оҕо тылын сайдыытын уонна кэһиллиитин туһунан сиһилии кэпсээтэ. «Солнышко» оҕо сайдар киинин логопеда Марианна Борисова «Роль артикуляционной гимнастики в развитии речи» араас артикуляционнай эрчиллиилэри көрдөрдө. Сунтаардааҕы 11 нүөмэрдээх «Кыталык» оҕо сайдар киинин логопеда Елена Андреева «Применение нейроигр в коррекции нарушений произносительной стороны речи» диэн араас нейро-оонньуу нөҥүө оҕо мэйиитин, саҥатын сайыннарар ньымалары көрдөрдө, ону таһынан истээччилэри хамаандаларга араартаан бэйэлэрэ нейро-оонньуулары толкуйдаан көмүскээтилэр. В.Г. Павлов аатынан алын сүһүөх оскуолатын логопеда Сайаана Аммосова «Организация работы учителя-логопеда с детьми с ОВЗ» уһуйаан уонна оскуола логопеда доруобуйатыгар хааччахтаах оҕолору кытта үлэлиир уопутун үллэһиннэ. Итини тэҥэ, Сунтаардааҕы 2 нүөмэрдээх «Сардаана» оҕо сайдар киинин логопеда Елена Иванова «ПМПК» сүрүн үлэтин билиһиннэрдэ. Бу курдук, кыттааччыларга семинар үрдүк таһымнаахтык ыытылынна.
Сунтаардааҕы 7-с нүөмэрдээх «Солнышко» оҕо сайдар
киинин сүрүн иитээччитэ Луиза Иванова, логопед Марианна Борисова