Арыылаах нэһилиэгэр Тыһакыыс сыһыытыгар улуустааҕы тыа хаһаайыстыбатын үлэһиттэригэр тэриллибит тэрээһин өрө күүрүүлээхтик, киэҥ далааһыннаахтык ааста. Халлаанныын ырааһыран, күннүүн сандааран, бэл, арҕааттан сэниэлээхтик тыалыран, эбэ салгынынан илгийэн, тыа сытынан дыргыйан, киэҥ нэлэмэн Тыһакыыс сыһыытыгар дьиҥ-чахчы сайыҥҥы күнү анаата.
Сайылык күнүн тэрээһинэ сири-уоту аһатыынан, тоҕус мэнэ хамсаныынан буруоҕа ыраастаныынан саҕаланна. Улууспут аҕыс нэһилиэгиттэн тыа хаһаайыстыбатын үлэһиттэрэ кэлбиттэр. Сунтаар улууһун баһылыгын имиджевай уонна социальнай политикаҕа солбуйааччы Гаврил Еремеев, улуустааҕы тыа хаһаайыстыбатын начальнигын солбуйааччы Григорий Готовцев, нэһилиэкпит баһылыга Иван Игнатьев эҕэрдэ тыл эттилэр уоннаүлэ бэтэрээннэригэр, тыа хаһаайыстыбатын үлэһиттэригэр наҕараада туттардылар.
Уһун Күөл уонна ыалдьыттар ылбаҕай ырыаһыттарын эҕэрдэтэ сайыҥҥы матыыпка силбэһэн, күөх суугуҥҥа холбосто, Кириэстээхтэн Үлэ Дьоруойа Владимир Михайлов ырыатынан ыалдьыттары сөхтөрдө.
«Благо-8» ТХПКК салайааччыта Римма Семенова сүөһү өлөрөн, кэлбит ыалдьыттары сибиэһэй ис, эт миинэ буһаран олохтоох дьаһалта уонна кээпэрэтиип үлэһиттэрэ дьону күндүлээтилэр. Ыалдьыттар тото эт сиэн, хоргуннаах миини астына иһэммит, Сайылык күнүн өбүгэ үгэһинэн көрүстүбүт.
Дьэ, итинник үөрэ-көтө кэпсэтэн, тото-хана аһаан баран, эбиэт кэннэ ыанньыксыттар уонна дьиэ кэргэнинэн улуустааҕы курэстэргэ нэһилиэктэр көхтөөхтүк кытыннылар. Ыанньыксыттар күрэстэрин улуус тыатын хаһаайыстыбатын управлениета , онтон дьиэ кэргэн күрэҕин спортинструктор Артем Тихонов иилээн-саҕалаан ыыттылар. Кыайыылаахтар бириис ылан, өрөгөйдөрө үрдээтэ .
Тэрээһини тэрийсибит тэрилтэлэрбитигэр , олохтоох дьаһалтаҕа, «Благо» ТХПКК үлэьиттэригэр, тыа хаһаайыстыбатын управлениетигэр махталбытын тиэрдэбит.
Веталина КОНСТАНТИНОВА, «Сарыал» култуура киинин дириэктэрэ