Илимниир сиригэр төрөөбүт Спиров Василий Алексеевич уолаттара – түөрт бырааттыылар Андрей, Иван, Ньукуус, Николай Аҕа дойдуну көмүскүүр сэриигэ кыттыбыттара, Ийэ дойдуларыгар ытык иэстэрин хорсуннук толорбуттара.
Андрей Васильевич Спиров «Ворошилов» холкуос чилиэнэ этэ. Аллыҥаттан силистээх-мутуктаах Марина Ляшеевалыын ыал буолан, быр-бааччы олорбуттара. Кини сэриигэ барарыгар кэргэнэ үс оҕолоох хаалбыт. Марина өр сылларга Илимнииргэ сүөһү иитиитигэр үлэлээбитэ.
Улахан кыыһа Христина Андреевна Спирова билигин «Новай» сопхуоска олорор, элбэх оҕолоох кырдьаҕас ыал ийэтэ, эбэтэ. Уола Григорий Андреевич – Ленин орденын кавалера, өр сылларга алмаас хостуур карьерга «Белаз» массыынаҕа суоппардаабыта, Мииринэй куоракка олорон күн сириттэн барбыта.
Андрей Васильевич 1942 с. Ньурба военкомунан ыҥырыллан барбыта уонна 1943 сыл ахсынньы ыйга сэриигэ өлбүтүн туһунан биллэриитэ кэлбит, ханна көмүллүбүтэ биллибэт. Арай Москва аттынааҕы кыргыһыыга кыттыбытын туһунан саха саллаата ахтан ааспыт этэ.
Спиров Иван Васильевич 1918 с. төрүөх. Кэргэнэ, оҕото суох сылдьан, 1942 сыллаахха Ньурба военкомунан ыҥырыллан сэриигэ барбыт, барыан иннинэ Сунтаарга милиция отделыгар үлэлээбит.
Гвардия-ефрейтор, сэрии хонуутугар 1944 с. от ыйын 3 күнүгэр охтубут, атырдьах ыйын 22 күнүгэр Литва Кальварийскай оройуонун Владиславово дэриэбинэҕэ көмүллүбүт. 1943 с. «Кыһыл Сулус» уордьанынан наҕараадаланным диэн суруйбута биллэр, ол эрээри ол сурук кыайан хараллыбакка сүппүт.
Павлов Ньукуус Васильевич 1914 с. Илимнииргэ төрөөбүт. Уол эһэтигэр Павел Эконовка иитиллибит, онон Павлов диэн араспаанньаламмыт. 1941 сыллаахха бастакы хомуурга барбыт, Ленинградскай фроҥҥа сэриилэспит, бааһыран 1943 сыл кыһыныгар дойдутугар кэлбитэ, колхознай-совхознай тутуу бэтэрээнэ. Кэргэнин дойдутугар Уһун Күөлгэ олорбуттара, кэргэнэ Васильева Мария Кирилловналыын 50 тахса сыл бииргэ олорбуттара, уон оҕону иитэн-харайан дьон кэккэтигэр таһаарбыттара.
1999 с. муус устарга 85 сааһыгар орто дойду олоҕуттан барбыта.
Спиров Николай Васильевич – 1926 с. төрүөх. 18 сааһын туолаат, 1944 с. бэс ыйын 22 күнүгэр сэриигэ ыҥырыллан барбыта. 1945 с. олунньуга Бастакы Украинскай фронт 21-с армиятын 543-с Гадчинскай полкаҕа түбэспитэ. Польшаҕа Бреславль куоракка оборонаҕа сыппыттар. Бастаан снайперскай винтовкаҕа үөрэнэн снайпер идэтин ылбыт. Николай оборонаҕа сытар кэмигэр взвод командира лейтенант Кочуров учуотунан 12 фашиһы өлөрбүт.
1948 сыл бэс ыйыгар диэри Чехословакияҕа, Венгрияҕа, Германияҕа араас чаастарга сулууспалаабыт. 1948 сыл атырдьах ыйын бүтүүтэ дойдутугар эргиллэн кэлбитэ уонна бастаан Сунтаарга леснигинэн үлэҕэ киирбитэ. Ол кэннэ өр кэмҥэ холкуоска буҕаалтырынан, сельпоҕа атыыһытынан, холкуоска, сопхуоска үлэлээбитэ. Кэргэнэ Федорова Анна Андреевна – Ньурба Аканатыттан төрүттээх. Барыта сэттэ оҕону иитэн-харайан сүһүөхтэригэр туруорбуттара. Николай Васильевич 1996 с. 70 сааһыгар бу дойдуттан букатыннаахтык арахпыта.
Сэрии толоонугар сырдык тыыннарын уурбут, сураҕа суох сүппүт, кыайыы кынаттанан кэлбит биир дойдулаахтарбытыгар төбөбүтүн төҥкөтөбүт, хоолдьуктаах бэйэбит хоҥкуйан туран сырдык ааттарын ааттаан туран хоҥкуйабыт, кэриэстиибит! Ким да умнуллубат, туох да умнуллубат!
Бэлэмнээтилэр «Дьулуур» КСК үлэһиттэрэ