СӨ үөрэх министиэристибэтэ сылын аайы ыытар өрөспүүбүлүкэтээҕи “Тыа сирин бастыҥ уһуйаана” куоҥкуруһун быйылгы кыайыылаахтара ааттаннылар. Кыайыылаахтары наҕараадалааһын бүгүн, балаҕан ыйын 27 күнүгэр, Саха сиригэр Саха Өрөспүүбүлүкэтин, онтон Арассыыйаҕа Иитээччи күнүгэр тоҕооһуннаран ыытылынна. Бу куоҥкурус оскуола иннинээҕи саастаах оҕолор тэрилтэлэрин айымньылаах үлэлэрин көҕүлүүр, педагог үлэһиттэр ааттарын үрдэтэр сыаллаах-соруктаах хаһыс да сылын ыытыллар. Быйылгы куоҥкуруска тыа сиригэр айа-тута үлэлии-хамныы олорор бастыҥ үлэлээх оҕо уһуйааннынан Сунтаардааҕы “Кыталык” оҕо сайдар киинэ ааттанна! Бырабыыталыстыба дьиэтигэр буолбут наҕараадалааһыҥҥа Сунтаар 11 №-дээх “Кыталык” МБОУ сэбиэдиссэйин солбуйааччы Светлана Григорьева үөрүүлээх быһыыга-майгыга бу үрдүк наҕарааданы тутта. Манна бастыҥ уһуйааннары кэккэ анал аат наҕараадалары туттардылар.
“Сунтаар сонуннара” хаһыат.
