Улууспутугар тыа хаһаайыстыбатын уонна астыыр-үөллүүр салаа үлэһиттэрин күнүн бэлиэтиир, дьоро тэрээһин сыллата үрдүк таһымнаахтык ыытыллар. Бу – хороҕор муостааҕы, сыспай сиэллээҕи, түргэнник ситэр дьиэ кыылын, көтөрүн иитэр, бааһынаттан өлгөм быйаҥнаах үүнээйини сомсон итиэннэ айылҕа барахсан бэрсибит аһын, тыа хаһаайыстыбатын бородууксуйатын оҥорон таһаарыыга сыралаһан үлэлиир дьону түмэр бэлиэ күн буолар.
Ол курдук, бүгүн С.А. Зверев- Кыыл Уолун аатынан улуустааҕы норуот айымньытын киинигэр атыы-эргиэн дьаарбаҥката тэрилиннэ. Манна тыа хаһаайыстыбатынан дьарыктанар биирдиилээн дьон уонна тэрээһиннээх хаһаайыстыбалар иһирдьэнэн-таһырдьанан сибиэһэй, хаачыстыбалаах аһы-үөлү, бэйэ оҥорон таһаарар бородууксуйаларын дэлэччи тардан, олохтоох дьоҥҥо хамаҕатык атыылаатылар.
Тэрээһиҥҥэ тыа хаһаайыстыбатын уонна аска-үөлгэ бэлиитикэтин миниистирэ Артем Александров кыттыыны ылла. Кини Сунтаарбыт улууһугар тыа хаһаайыстыбатын сайыннарар дьону көрсөн сэһэргэстэ, оҥорон таһаарар бородууксуйаларын туһунан сиһилии билистэ.
Бу, дьаарбаҥкаҕа Кириэстээх нэһилиэгиттэн сылдьар, тыа хаһаайыстыбатынан дьарыгырар Балаҕаннаах Сыдьаайа биэс дьиэ кэргэҥҥэ бэйэтин бородууксуйатыттан бэлэх уунна.
Олохтоох дьон дьаарбаҥкаттан ынах, сылгы этин, кутуллубут хааны, халадьыаһы, индюк этин, үрүҥ ас эгэлгэтин уо.д.а. атыылаһан, үөрэн-көтөн тарҕастылар.
Елизавета ТИТОВА