Төрөөбүт төрүт тыл, сурук-бичик күнүн көрсө бүгүн С.А.Зверев-Кыыл Уолун аатынан норуот айымньытын киинигэр олус ураты, сонун «Төрүт тыл түһүлгэтэ» көрсүһүү тэрилиннэ. Бу тэрээһини өрөспүүбүлүкэбитигэр «Күөрэгэй» эдэр көхтөөх ийэлэрин хамсааһынын Сунтаардааҕы түмсүүтүн кыттааччыта Сардаана Афанасьева көҕүлээһининэн ыытылынна. «Күөрэгэй» түмсүү туһунан кылгастык сырдаттахха өрөспүүбүлүкэбитигэр эдэр көхтөөх ийэлэр түмсүүлэрэ 2019 с. тэриллибит. Олох сайдыытын тэтимигэр төрүт тылбытынан саҥарбат буолуу, кыра саастаах оҕоттон саҕалаан нууччалыы, сахалыы булкуйан кэпсэтэллэрэ баар көстүү. Манан сиэттэрэн төрөөбүт төрүт тыл сүтэн симэлийэн хаалбатыгар баҕа өттүлэринэн бу түмсүү үлэлэһэ сылдьаллар. Сүрүн сыаллара хас биирдии киһи, оҕо сахалыы билэр, саҥарар буолуутун ситиһии. Оттон бүгүҥҥү көрсүһүүгэ анаан-минээн төрүт тыл түһүлгэтигэр Дьокуускайтан ыҥырыылаах ыалдьыттар юрист, блогер, саха тылын өрө тутар Сандаара Кулаковская, эндокринолог, уролог, андролог, «Арктик Дельта групп» генеральнай дириэктэрэ уонна «Арктикбио» хампаанньа төрүттээччитэ, Николай Григорьев, «Барҕарыы» пуонда сүрүн исписэлииһэ Майя Поисеева, сахалыы тылынан үөрэтэр логопед Валентина Татаева, «Сахалыы» сахалыы тылынан үөрэтэр сыһыарыы ааптара, блогер Лилия Бэчигэн. Кинилэр бары сахабыт тылынан сайа саҥарарга ис сүрэхтэриттэн үлэлэһэ сылдьаллар.
Сахабыт тыла сайдыытын тула хас биирдии ыалдьыт тус санааларын үллэһиннилэр. Ол курдук, ийэ тылбытын дьиэ кэргэҥҥэ төрүттээһини, сахалыы тыыннаах эйгэни тэрийиини, икки тылынан саҥарыыны, кыра саастаах оҕо тылын оонньуу нөҥүө сайыннарыыны о.д.а. сэһэргээтилэр. Николай Григорьев киһи ис туруга чэгиэн-чэбдик, доруобай эрэ туруктаах буоллаҕына норуот быһыытынан сахалыы сайа саҥаран сайдыы суолун тутуоҕа диэн интэриэһинэй иһитиннэриини оҥордо.
Маны сэргэ, тэрээһин чэрчитинэн «Арктик Дельта групп» клиника «Омега-3-индекс» диэн эт-хаан Омега-3 хааччыллыытын сыаналааһын аналиһын тутуутун тэрийдилэр.
Кэлбит дьон ыйытыктарын, санааларын уонна кэскиллээх тэрээһини ылсыбыт дьон үлэлэрэ ситиһиилээх буоларыгар баҕа санааларын эттилэр.
Алена ИВАНОВА