Быйыл улууспутугар биллэриллибит Төрөөбүт төрүт тыл сылын чэрчитинэн, Бүлүүчээҥҥэ баһылыкпыт Сергей Барамыгин бу ыйы «Төрөөбүт тыл – норуот сайдар кэскилэ” диэн ааттаах ыйынньыгынан (месячник) биллэрбитэ.
Бу ыйынньык чэрчитинэн, нэһилиэккэ сүрдээх сэргэхсийии буола турар. Ол курдук, нэһилиэк тэрилтэлэрин икки ардыларыгар саха суруйааччыларын айымньыларынан испэктээкил туруоруутугар күрэс ыытыллар. Бу субуотаҕа олохтоох дьаһалта, бибилэтиэкэ уонна култуура киинин үлэһиттэрэ Н.Неустроев «Тиэтэйбит» комедиятынан испэктээкил турурдулар. Оттон В.Г.Акимов аатынан лиссиэй-интэринээт кэлэктиибэ тэттик сценкалары көрдөрөн, олохтоохтору сөхтөрдүлэр. Бу күн нэһилиэкпит дьоно бэртээхэй испэктээкили, сценкалары көрөн дуоһуйа астынан, сынньанан тарҕастылар.
Күрэспит салгыы барар. Онон үлэһит дьоммут талааннарын көрөөрү кэлэр нэдиэлэ бүтүүтүн күүтэбит.
Айталина МИХАЙЛОВА