Ахсынньы ый 17-18 күнүгэр Бүлүү уокуругар бастакы оскуола тэриллибитэ 195 cыллаах үбүлүөйүн чэрчитинэн олус сэргэх тэрээһин буолан ааста.
Бу тэрээһиҥҥэ Сунтаар, Үөһээ Бүлүү, Горнай улуустарыттан кэлэн кытыннылар.
Тэрээһин бастакы күнүгэр математика, физика, биология, химия предметтэригэр биир кэлимсэ экзээмэн профильнай таһымыгар бэлэмнээһин туһунан «Продвижение+» диэн сэминээр ыытылынна. Бу сэминээргэ Сунтаар политехническэй лицей-интернатын математика учуутала Т.Я. Маркова үлэтин опытыттан үллэһиннэ.
Иккис күнүгэр “Саҥа көрүүлэр, саҕахтар” диэн төгүрүк остуолга СӨ билим Акадьыамыйатын Төрөөбүт тылы үөрэтэр, харыстыыр уонна сайыннарар киин салайааччыта, профессор Ф.В. Габышева саха тылын уонна литэрэтиирэтин учууталларын иккис сийиэһин уурааҕын олоххо киллэриигэ барбыт үлэни сырдатта, тыҥаан турар кыһалҕалары тула кэпсэттэ. Сүрүн болҕомто аныгы ирдэбилгэ эппиэттиир саха тылын кабинеттара баар буолуохтааҕын туруорсууга, БГҮӨС ирдэбилигэр эппиэттиир саҥа учуобунньуктар оҥоһуллалларыгар ыытыллар үлэҕэ уурулларын, уо.д.а боппуруостары иһитиннэрдэ. 2025 сылга Бүлүү уокуругун үөрэхтээһинин форума Сунтаарга ыытыллара былааннанарын, саха тылын учууталларын үһүс сийиэһин тэрийии тоҕоостооҕун бэлиэтээтэ.
Бу кэпсэтии кыттыылаахтара улуустарыгар иккис сийиэс уурааҕа олоххо киириитигэр ыытыллыбыт үлэни сырдаттылар. Ол курдук, Сунтаар лицей-интернатын учуутала Кондратьева М.В. “2 сийиэс уурааҕын Сунтаар улууһугар киллэриигэ ыытыллыбыт үлэлэр хайысхалара”, Арыылаах агро-оскуолатын учуутала Ноговицына Е.П. “Үөрэх кэбиниэтигэр айымньылаах үлэ эйгэтин тэрийии”, А.П. Павлов аатынан Сунтаар 1№-дээх орто оскуолатын учуутала Фокинова Т.А. “Төрөөбүт тыл сүмэтин оҕону иитиигэ, сайыннарыыга туһаныы”, Сунтаар улууһун култууратын уонна айылгытын сүрүн специалиһа, фольклор куруһуогун салайааччыта Алексеева Т.А. “Оҕо уонна олоҥхо”, Кутана орто оскуолатын учуутала Архангельская Е.Е. “Сахалыы эйгэҕэ иитиигэ, тылы-өһү сайыннарыыга хайысхалар” диэн тиэмэлэринэн үлэлэрин опытын үллэһиннилэр.
Форум олус таһаарыылаахтык үрдук таһымҥа ыытылынна, элбэҕи биллибит-көрдүбүт, үгүскэ үөрэннибит диэн пуорум кыттыылаахтара санааларын үллэһиннилэр.
- Фокинова Т.А. саха тылын уонна
литературатын учуутала