РФ Сыыппара сайдыытыгар, сибээскэ уонна маассабай коммуникацияҕа министиэрстибэтэ, бэрэсидьиэн Владимир Путин анал дьаһалынан, Арассыыйа бары регионнарын сибээһэ суох нэһилиэктэригэр түргэн 4G интэриниэти уонна суотабай сибээһи киллэрэргэ (100-500 нэһилиэнньэлээх пууҥҥа) сылын аайы Госуслуганан куоластааһыны ыытар. Былырыын Саха сирин бэриллибит 14 квотаҕа аҕыйах нэһилиэнньэлээх пууннарга куоластааһын 2022 с. ахсынньытыгар биир ый устата ыытыллыбыта. Онно уопсай түмүгүнэн, Арассыыйа үрдүнэн, 899 865 киһи куоластаабыта, онтон Саха сиригэр 20 854 киһи куоластаан, Сунтаар улууһуттан 4 нэһилиэк хабыллан, инники 6 миэстэҕэ киирбиппит. Тэҥкэ нэһилиэгэ 1230 куолаһы ылан, өрөспүүблүкэҕэ 3-с миэстэҕэ тахсан кыайыы өрөгөйүн билбиппит. Куоластааһыҥҥа Сунтаар, Тэҥкэ олохтоохторо Госуслуги сыһыарыынан уонна кумааҕынан илии баттаан кыттыбыттара.
Быйыл суотабай сибээһи, интэриниэти холбооһуҥҥа Саха сиринээҕи Ростелекому ыкса үлэ ыытыллан, алтынньыга Тэҥкэҕэ 30 миэтэрэ үрдүктээх вышканы туруордулар. Сэтинньи 1 күнүгэр, суотабай сибээс анал симкэ карталарын олохтоохторго босхо түҥэттилэр. Инньэ гынан нэһилиэк олохтоохторо сибээскэ холбонон, дьоннорун кытта кэпсэтэн, интэриниэтэ түргэнин билэн үөрүүлэрэ муҥура суох.
Тэҥкэҕэ сибээс киириитин үөрүүлээх тэрээһинэ бүгүн, сэтинньи 2 күнүгэр, ыытылынна.
Үөрүүлээх күҥҥэ улуус баһылыга Анатолий Григорьев тахсан, олохтоохтору эҕэрдэлээтэ. Суотабай сибээһинэн Аҕа дойду сэриитин кыттыылааҕа Петр Яковлев, улуус баһылыгын бастакы солбуйааччы Николай Александров, Дьокуускайтан «Ростелеком» тэрилтэтин сүрүннүүр исписэлииһэ Василий Бочкарев кыттан, олохтоохтору эҕэрдэлээтилэр. Мин эмиэ дьоммун-сэргэбин куйаар ситиминэн эҕэрдэлээтим, нэһилиэгин үөрүүтүн үллэһинним.
Куоластааһыҥҥа кыттыбыт бар дьоммутугар, улууспут дьаһалтататыгар дириҥ махталбын биллэрэбин, нэһилиэгим олохтоохторугар бу бэлиэ түгэнинэн эҕэрдэбин тириэрдэбин.
Тэҥкэбитигэр сайдыы биир сүүрээнэ киирдэ, өссө да саҥа саҕахтары күүтэбит.
Светлана ИГНАТЬЕВА, Тэҥкэ нэһилиэгин баһылыга