Хоро нэһилиэгин олохтооҕо Светлана Игнатьева С.А.Зверев-Кыыл Уолун аатынан холбоһуктаах түмэлгэ «Сүрэҕим сылааһын иҥэрэн» диэн айар быыстапкатын туруорда. Манна Светлана Игнатьева араас ураты, көрүөхтэн кэрэ оҥоһуктарын көрдөрүүгэ аҕалбыт. Маастар бэйэтэ Хоро нэһилиэгиттэн төрүттээх. Сынньалаҥҥа тахсыар диэри Хоро оскуолатыгар ситиһиилээхтик үлэлээбитэ.
Быыстапкаҕа сутажтан, «эпоксиднай смолаттан», далбар хотун араас киэргэллэрин, хаппардарын, симэхтэрин бэйэтэ тикпит сахалыы моһуоннаах таҥастарын уо.д.а. оҥоһуктарын туруорда.
Светлана Игнатьеваны бу бэлиэ түгэнинэн чугас дьоно, биир үөлээннээхтэрэ итиитик-истиҥник эҕэрдэлээтилэр. Айар үлэтигэр ситиһиилэри баҕардылар. Маастар үлэлэрин туһунан кэлбит ыалдьыттарга сиһилии кэпсээн биэрдэ: «Мин иис-уус абылаҥар дьиэ-уот тэринэн, оҕолонон баран ылсыбытым. Хас биирдии оҥоһукпар истиҥ санаабын, иэйиибин уурабын. Дууһам тугу этэринэн, баҕарарынан дьарыктанабын. Ол иһин да буолуо, дьарыгым олус элбэх. Өссө да элбэххэ үөрэнэр соруктаахпын» диэтэ.
Светлана Игнатьева бэйэтэ эрэ иистэммэт, ураты кэрэ оҥоһуктары оҥорорго биир дойдулаахтарын үөрэтэр, сатабылын үллэстэр. Кини ыйыытынан-кэрдиитинэн иис-уус кистэлэҥигэр элбэххэ үөрэммит дьон баара үөрдэр. Уһуйбут дьоно Светланаттан элбэххэ үөрэнэбит диэн махтанан туран эттилэр. Ордук маастар кэрэ аҥар тутар хаппардарын, симэхтэрин сөбүлээн тигэр эбит. Кини оҥорбут хаппардара ханна да хатыламмат, ураты кэрэ оҥоһуулаахтар. Быыстапкаҕа көрдөххө маастар үгүс үлэлэригэр оҕуруону тиһэн киллэрэрэ көстөр. Ону тэҥэ, быйыл баатанан куукула оҥорору баһылаабыт. Бу үөрүйэҕин эмиэ бар дьоҥҥо үллэстэр санаалааҕын эттэ.
Быыстапканы көрө эрэ буолбакка, чуолаан киэргэл оҥоһуктары оҥорор дьон бэйэлэригэр саҥаны-сонуну арыйыахтара диэн эрэнэбит.
Мира АФАНАСЬЕВА
