Сунтаарбыт нэһилиэгэр бу аҕыйах сылтан бэттэх дьон олороругар диэн толору хааччыллыылаах 2, 4, 5 этээстээх таас дьиэлэри тутан үлэҕэ киллэрэр буоллулар. Онно уруккута үйэлэрин тухары мас дьиэҕэ олорбут, маһынан оттунан, уулуссаҕа тахсан киирэн үгүс күчүмэҕэйдэри көрсүбүт дьон буоллахтара. Кинилэр билигин тупсаҕай оҥоһуулаах дьиэҕэ киирэн, олус сынньалаҥнык олороллорун туһунан астына кэпсииллэр:
Раиса Артемьева, Сунтаар олохтооҕо, бочуоттаах сынньалаҥҥа олорор:
Сааһыран баран толору хааччыллыылаах таас дьиэҕэ көһөн олорорбуттан олус үөрэбин. Урукку олохпор холоонноох буолуо дуо. Олус сынньалаҥ. Хата, кыһынын дьиэм сылаас. Онтон ордук миэхэ туох да наадата суох. Сунтаарга таас дьиэлэр тутуллар буолбуттара хайҕаллаах дьыала дии саныыбын. Олоҕу кытта тэҥҥэ хардыылыыр кэм да кэллэҕэ дии».
Михаил Иванов, Сунтаар нэһилиэгин олохтооҕо:
Уруккута мин Кутанаҕа олорбутум. Хаһаайыстыбаҕын барытын бэйэҥ көрүнэҕин. Саас саһаанныыгын, сайынын оттуугун. Оттук сезона саҕаланнаҕына хачыгаарынан үлэлиигин. Сааһыран баран оҕобор кэлэн толору хааччыллыылаах дьиэҕэ олорон абыранан сылдьабын. Билигин кэлэн, саас да баттаан, мэнээк таһырдьа тахсыбаппын. Дьиэҕэ туохха наадыйарыҥ барыта баар. Бэрт баҕайы».
Марфа Семенова, Сунтаардааҕы технологическай колледж дириэктэрин солбуйааччы:
Биһиги 2022 с. кыһыныгар оччолорго 70 лет Октября уулуссаҕа саҥа тутуллубут түөрт этээстээх таас дьиэҕэ «Хаарбах дьиэттэн дьону көһөрүү» бырагыраама чэрчитинэн көһөн киирбиппит. Ол иннинэ биһиги Петр Иванов уулуссатын 1 №-дээх 4 квартиралаах уопсай дьиэтигэр олоро сылдьыбыппыт. Билигин ол дьиэни көтүрбүттэрэ. Толору хааччыллыылаах дьиэҕэ олорор үчүгэй бөҕө буоллаҕа. Кыһынын дьиэбит сылаас, ис оҥоһуута да санаабыт курдук үчүгэй».
Дьэ, ити курдук кэпсэппит дьоммут саҥа дьиэҕэ көһөн олороллоруттан астыналларын туһунан билинэллэр.
Гаврил АНДРЕЕВ.