Сунтаар улууһун, нэһилиэгин бочуоттаах олохтооҕо, учууталлар учууталлара, улууспут биир мааны Далбара Изабелла Ильинична Попова саҥа тахсыбыт кинигэтин туһунан билсиһиннэриэхпин баҕарабын.
Изабелла Ильинична быйыл 80 сааһын туолла уонна бу муударай сааһынан оҕо сааһыттан күн бүгүнүгэр диэри доҕордоһо сылдьар дьүөгэлэрин үс түһүмэхтээн суруйбут. Оҕо эрдэҕиттэн саҕалаан дьүөгэлэспит сунтаардааҕы хас биирдии дьүөгэтин олус истиҥник суруйбут. Саамай сөҕөрүм диэн, бачча саастарыгар диэри бэйэ бэйэлэриттэн тэйсибэккэ, күн бүгүнүгэр диэри алтыһа сылдьаллар. Бары үөрэхтэрин бүтэрэн, өр сылларга төрөөбүт улуустарыгар учууталлаан, билигин бочуоттаах сынньалаҥҥа олороллор. Кинигэ бастакы түһүмэҕэ оҕо сааһыттан Тойбохой нэһилиэгэр олоро сылдьан алтыспыт дьүөгэтэ Рея Ивановна Исаеваттан (Кириллинаттан) саҕаланар. Рея Ивановна нуучча тылын учууталынан отучча сыл үлэлээбит. Реяттан аан бастаан нууччалыы суруллубут кинигэлэри ааҕарга үөрэммитин олус истиҥник ахтар. Билигин куоракка хас саас ахсын Рея Ивановна тыаттан бастакы куһу ыыттахтарына эбэһээт ыҥыртаан амсатар эбит.
Изабелла Ильинична Сунтаарга бииргэ үөрэммит, оскуоланы бүтэрбит оҕолорун кытары билиҥҥэ диэри сибээстэһэллэр. Үөрүүлэрин-көтүүлэрин, төрөөбүт саастарын бары бииргэ түмсэн бэлиэтиир үгэстээхтэр. Оскуоланы 23 оҕо бииргэ бүтэрбиттэртэн билигин аҥардара суохтарын да иһин, күн бүгүнүгэр диэри эдэр саас эрчиминэн сылдьаллар. Олортон бары биһиги сунтаардар билэр киһибит Лидия Николаевна Петрова буолар. Кини айылҕа араас көстүүлэрин мэлдьи хаартыскаҕа хатыыр, айар талааннаах дьүөгэтин туһунан эмиэ олус истиҥник ахтар.
Бу кинигэтигэр Сунтаар иккис нүөмэрдээх орто оскуолатыгар үлэлии сылдьан алтыспыт учуутал дьүөгэлэрин Лия Николаевна Саввинова, Лия Митрофановна Егорова онтон да атыттар тустарынан олус истиҥник ахтар.
Изабелла Ильинична кинигэтин «Дорогие сердцу моему» диэн ааттаан нууччалыы тылынан суруйбут. Дьүөгэлэрин олохторун, дьарыктарын суруйан үйэтитэн, ааҕааччыларыгар истиҥ иһирэх кинигэни суруйбутуттан үөрэбит.
Изабелла Ильинична ыраас дууһалаах, аныгылыы көрүүлээх, олоҕу истиҥник сыаналыыр мааны Далбар буолар. Пааркаҕа мэлдьи хаамар, быысабайдыыр, хоһоон айар. Кини компьютеры үчүгэйдик баһылаан, барытын бэйэтэ бэчээттиир.
Үтүө-мааны Далбарбыт күн курдук сырдыы, өссө айа-тута сырыт!
Марта НИКОЛАЕВА.
