Дойду бэрэсидьиэнэ Владимир Путин бэлиэтээбитинэн, СВО кыттылаахтарын оҕолоругар ураты болҕомто ууруллуохтаах. Байыаннай дьайыы кыттыылаахтарын дьиэ кэргэттэрин өйүүр сыалтан, байыастар оҕолоро «СВОи» бырайыак чэрчитинэн, үрдүкү кылаас үөрэнээччитэ босхо идэ ылар кыахтаах. Ол курдук, Сунтаардааҕы технологическай колледжка олунньуттан ыам ыйыгар диэри 4 идэҕэ уопсайа 11 оҕо үөрэннэ. Тойбохойтон, Аллыҥаттан, Сунтаар 1-кы №-дээх оскуолатыттан, гимназияттан, Күндэйэттэн 9-с, 10-с, 11-с кылаас үөрэнээччилэрэ уһуйулуннулар. Кинилэр «С» категорияҕа «Тракторист», «Повар», «Закройщик», «В» категориялаах суоппар идэтин ыллылар.
«Аны балаҕан ыйыттан ахсынньыга диэри 10-ча оҕону «Тракторист» уонна «Закройщик» идэтигэр үөрэтэргэ квота көрдөөн олоробут. Билигин үөрэх салалтатыттан испииһэк ылан оскуолалары кытта ыкса сибээстээх үлэ бара турар. Түгэнинэн туһанан, үөрэммит оҕолор нэһилиэктэрин баһылыктарыгар, оскуолаларын дириэктэрдэригэр уонна үөрэҕирии управлениетын салайааччытын солбуйааччытыгар Борис Васильевка биир сыаллаах, ситимнээх үлэлэрин иһин колледж кэлэктиибин аатыттан улахан махталбытын тириэрдэбит», – диэн пофессиональнай үөрэхтээһин исписэлииһэ Альбина Михайлова иһитиннэрдэ.
Оҕолор ылбыт идэлэрэ, билиилэрэ олохторугар көмө буолара саарбаҕа суох.
Алена ИВАНОВА