Байыаннай дьайыыга сылдьар биир дойдулаахтарбыт дьиэ кэргэттэригэр улуус, нэһилиэктэр салалталара бары өттүнэн күүс-көмө буолаллар.
Дойду үрдүнэн буолуохтаах Ийэ күнүгэр анаан бүгүн Сунтаар нэһилиэгин олохтоох дьаһалтата анал байыаннай дьайыыга сылдьар уолаттарбыт ийэлэрин, кэргэттэрин кытта көрсүһүүнү тэрийдэ.
Көрсүһүү бу дьиэ кэргэттэр билигин туох кыһалҕалаахтарын, ханнык хайысхаҕа мунаарар боппуруостаахтарын тула кэпсэтэр, туох кыалларынан көмө оҥорор соруктаах тэрилиннэ.
Нэһилиэкпит баһылыга Эдуард Филиппов бастатан туран, ийэлэргэ уонна уолаттар кэргэттэригэр кэлэн иһэр бырааһынньыгынан дьаһалта уонна нэһилиэк сэбиэтин дьокутааттарын аатыттан эҕэрдэ сурук туттарда. Улууспут баһылыга Анатолий Григорьев аатыттан исписэлиис Тамара Иванова истиҥ эҕэрдэ тылларын анаан туран, уолаттарбыт этэҥҥэ доруобай эргиллэн кэллиннэр диэн баҕа санаатын эттэ.
Көрсүһүүгэ элбэх тэрилтэ салайааччылара кыттан, бэйэлэригэр сыһыаннаах боппуруостары бэлиэтэннилэр. Онон үөрэтэн көрөн, төһө кыалларынан быһаарарга үлэлэһиэхтэрэ.
Ийэлэр, кэргэттэр күннээҕи олоххо көрсөр кыһалҕалара билигин баар бөҕө буоллаҕа. Манна саамай сытыы боппуруостар — оттук мас, муус, дьиэ ититиитэ, автобус сырыыта буолла. Ону тэҥэ доруобуйа харыстабылыгар, социальнай эйгэҕэ сыһыаннаах элбэх ыйытыы киирдэ. Холобур, бырааска уочарата суох киирии боппуруоһун өссө үчүгэйдик сирийэн толкуйданыахтааҕын эттилэр уонна көрдөрүнэ барарга-кэлэргэ айан ороскуотун туһунан ыйыттылар.
Тэрээһиҥҥэ байыаннай дьайыыттан уоппускаҕа кэлэ сылдьар биир дойдулаахпыт Константин кыттыыны ылла. Көрсүһүүгэ кэлбит ийэлэр улахан тымныы түһүөн иннинэ муус тиэйэн аҕалбыттарыгар уонна бу маннык чопчу кыһалҕалары кэпсэтэн, быһаарар, сүбэ-ама, көмө оҥоһулларыгар махталларын эттилэр.
Алена ИВАНОВА