СӨ үөрэҕин уонна билимин министиэристибэтэ уонна ГИБДД Саха сиринээҕи управлениета сөбүлэҥ түһэрсиилэринэн, атырдьах ыйын 15 күнүттэн балаҕан ыйын 15 күнүгэр диэри оперативнай-сэрэтэр тэрээһин чэрчитинэн «Внимание дети!» аахсыйа биллэриллибитэ.
Бүгүн, Сунтаар улууһугар бу аахсыйа 2-с этааба буола турар. Ол курдук үөрэҕирии салаатын үлэһиттэрин балаҕан ыйынааҕы сүбэ мунньахтарыгар сөп түбэһиннэрэн, оскуола суоппардарыгар сэрэтэр үлэ ыытылынна. Сунтаардааҕы ГИБДД сулууспатын салайааччыта, полиция хапытаана Сахайан Александров уонна суол инспектордара буолан, тырааныспардар тиэхиниичэскэй туруктарын бэрэбиэркэлээтилэр, көрдүлэр-иһиттилэр. Оҕо-аймаҕы тиэйэр анал автобустар, хайаан да суолга сырдырҕыыр араҕас уоттарын холбуу сылдьалларын тоһоҕолоон эттилэр. Манна даҕатан оҕону тиэйэр тырааныспарга атын суоппардар суолга-иискэ мэһэй олохтообокко, сэрэхтээх буолалларыгар ыҥырдылар.
Лука Данилов, Бүлүүчээн оскуолатын суоппара: «Оскуолаҕа суоппардаабытым биир сыл буолла. Үлэ этэҥҥэ, туох да харгыһа суох баран иһэр. Оҕону тиэйэр-таһар саамай эппиэтинэстээх үлэ. Онон суол быраабылатын тутуһан, тиэхиникэни сөбүгэр көрүнэ сырыттахха эрэ табыллар. Ардыгар суолга атын суоппардар сөбө суох быһыыланалларыттан киһи олус хомойор. Оҕону тиэйэр массыына хаһан баҕарар «переимуществолааҕын» өйдөөн суолга бытаара түһүөхтэрин наада».
Елизавета ТИТОВА.