Дойду бэрэсидьиэнэ Владимир Путин Саха сирин IT уонна креативнай салааларга ситиһиилэрин, инники былааннарын көрдө. Ону тэҥэ, Владимир Владимирович Уһук Илиҥҥэ «Земскэй доктор», «Земскэй учуутал», «Муравьев-Амурскай 2030» тосхоллор үлэлэрин кытта билистэ. Бу бырагыраамалар кыттааччыларын, ону тэҥэ Уһук Илиҥҥэ үлэлиир култуура диэйэтэллэрин кытары кэпсэттэ.
Көрсүһүүгэ Сунтаартан СӨ култууратын туйгуна, Кириэстээх нэһилиэгин «Саргы түһүлгэтэ» КК уус-уран салайааччыта Августина Платонова уонна Туойдаах нэһилиэгэр «Земскэй учуутал» тосхолунан Тываттан математика учууталынан үлэлии кэлбит Ильяна Когоол кыттыыны ыллылар.
Санатан этэр буоллахха, Кириэстээххэ дойду бэрэсидьиэнэ тус хонтуруолугар турар «Култуура» национальнай бырайыагынан култуура дьиэтэ тутулла турар. Августина Платонова Владимир Путиҥҥа Кириэстээх нэһилиэгин олохтоохторуттан махталларын тириэртэ. Кини «Тыа сирин култууратын үлэһитэ» бырагыраама үлэҕэ киирдэҕинэ, маннык хабааннаах тосхоллорго курдук көрүллэр үптэн нолуок тутуллубат буолуоҕун баҕарарын эттэ. Онуоха Владимир Путин толору өйүүрүн бигэргэппитин бары үөрэ иһиттилэр.
Ильяна Когоол «Тыа сирин учуутала» тосхолунан төлөбүр үрдүүрүгэр баҕа санаатын эттэ.
Мира АФАНАСЬЕВА