Сунтаар алын сүһүɵх оскуолата 2019 сылтан «Куолу» диэн уол оҕолорго аналлаах күрэһи иилээн-саҕалаан тэрийэр.
Харысхан Семенов «Куолу» улуустааҕы күрэскэ Кэмпэндээйи оскуолатыттан талыллан, ааттаан-суоллаан кэлэн хоммут уоһун хоҥуннаран бастакы түһүмэххэ саха сиэрдээх быһыытын куолулаата.
Үгэскэ кубулуйбут тэрээһин быйыл бэһис сыла. Сылын аайы холонооччу уолаттар элбииллэрэ үɵрдэр, быйыл 26 уол оҕо кыттар. Бастакы түһүмэххэ тута ылбыт тиэмэлэрин арыйаллар, иккискэ сомоҕо домохтору быһаараллар, үһүскэ хартыынанан үлэлииллэр.
Күрэһи Сунтаарга тɵрүттээчи, тэрийээччи учуутал Лена Петрова. Кини 2018 сыллаахха Айыы кыһатыгар «Куолу» күрэс кыра уолаттарга туһааннан ыытыллыбытын кɵрɵн, сэргээн дойдутугар кэлэн тирэхтээбит.
Бастакы «Куолу» кыттааччылара билигин тохсус кылаастар. Тэрээһиҥҥэ ытык-мааны ыалдьыт буолан күрэс туһата, көдьүүһэ сүрдээҕин туһунан санааларын үллэһиннилэр.
Күрэс түмүгүнэн кылаан кыайыылаахтарынан 3 кылаастарга Күндэйэ оскуолатын үөрэнэччитэ Арылхан Дьяконов, 4 кылаастарга Сунтаар санаторнай оскуолатын үөрэнээччитэ Кирсан Васильев.
Тэрээһин кɵмɵтүнэн оҕо дьон олус сайдаллар. Сахалыы куолулаан саха буолан сандаараллар. Хата биһиги да, улахан дьон арааһы, быдьары кураанаҕы куолулуохтааҕар оҕолорбутунаан киэһэҥҥи сандалыга саха тылын сайдыытын куолулаһыаҕыҥ!
Тускулаана ГОРОХОВА-КОБЕЛЬЯНОВА