Тохсунньу 17,18 күнүгэр С.А.Зверев-Кыыл Уолун аатынан улуустааҕы норуот айымньытын киинигэр М.З.Мартынов-Бөөдөс уола “Уол Дуолан бухатыыр” олоҥхо премьерата буолар.
Бу олоҥхо туруоруутун туһунан өссө 2023с. кэпсэтиилэр барбыттара. Дьэ, олоҥхо силигэ ситэн анал идэлээх дьон үлэлэһэн, көстүүмнэри Москва куоракка тиктэрэн Сибиэрэп киинин сыанатыгар туран эрэр. Уопсайа олоҥхоҕо 92 киһи кыттар. Оруолларга норуот талба талааннаахтара уонна артыыс идэтэ суох дьон оонньуохтара. Сорох дьон саҥа бастакытын сыанаҕа сүрэхтэнэллэр. 9 чаас усталаах олоҥхону 1.5 чааска кылгатан, сыанаҕа көрдөрүүгэ анаан таҥан оҥордулар. Олоҥхо туруоруута С.А.Зверев-Кыыл Уола төрөөбүтэ 125 сылыгар ананар. Көрөөччүнү соһутаары тэрийээччилэр туруоруу ис тутулун толору кэпсээбэтилэр. Элбэх уот-күөс, аныгы тыыннаах муусука, ураты таҥас-сап, үҥкүү, ырыа-тойук көстүөҕэ диэн эрэннэрдилэр.
Директор Алексей Седалищев, туруорааччы режиссер Антон Ботаков, көстүүм уонна сыана худуоһунньуга Екатерина Шопошникова, дизайнер Дора Тихонова-Айкуо, хореограф Ева Шамаева, сценарий Зоя Попова, көстүүм уонна реквизит Ирина Митина, Любовь Прокопьева, муусуканы оҥордулар Юрий Спиридонов-Сиэн Тиитэп, Ньургун Данилов, Анатолий Пахомов, тыас-уус Ариан Лаптев, уот-күөс Михаил Иванов, экран Павел Кузьмин.
«Сунтаар сонуннара»