Бэҕэһээ СӨ Бырабыыталыстыбатын ааспыт сыллааҕы үлэтин отчуоттуур бөлөх Сунтаар нэһилиэгэр үлэлээтэ. Ол курдук, сарсыарда өттүгэр бырабыыталыстыба чилиэннэрэ улуус олохтоохторугар прием оҥорон, кэлбит биирдиилээн дьону кытары кэпсэттилэр.
Оттон күнүс 2 чаастан С.А. Зверев-Кыыл Уолун аатынан норуот айымньытын киинигэр Сунтаар нэһилиэгин олохтоохторун иннигэр түмүктүүр отчуоту туруорда. Отчуоту истэ, дьүүллэһэ, этиилэрин тириэрдэ үгүс киһи сырытта.
Ааспыт сылга өрөспүүбүлүкэҕэ туох, ханнык үлэлэр ыытыллыбыттарын, инники соруктары истэн баран, олохтоохтор бары салааларынан элбэх ыйытыыны биэрдилэр.
Үгүс элбэх ыйытыыттан холобурдаатахха, өрөспүүбүлүкэҕэ да, улууспутугар да үгүс элбэх араас бырайыактарынан тутуу барбытын бэлиэтээн туран, Сунтаар нэһилиэгэр Хомустаах микрооройуоҥҥа оскуола-саад, РТС территориятыгар оскуола, улуус киинигэр баһаарынай чаас, «Туллукчаан» оҕо сайдар киинин тутуута инвестбырагыраамаҕа киирэн тутуллуо дуо? диэн элбэх киһи ыйытта. Манна туһааннаах министиэристибэ үлэһиттэрэ толору эппиэт биэрдилэр. Ол курдук, Хомустаах микрооройуоҥҥа оскуола-саад тутуута былааҥҥа баар, ол эрэн билигин улуус киинигэр өрөспүүбүлүкэ таһымнаах поилтехническай лиссиэй тутуутун бүтэрэр соруктаахпыт. Оскуола-саад бырайыага экспертизаҕа баран турар диэн буолла. Балыыһа комплексын иккис уочарата хаһан тутуллуоҕун туһунан ыйытыга эмиэ бырайыактыыр үлэтэ бара турарын иһитиннэрдилэр. Манна даҕатан эттэххэ, дойдубут бэрэсидьиэнэ “Модернизация первичного звена объектов здравоохранения» федеральнай бырагырааманан нэһилиэнньэлээх пууннарга поликлиникалары, фельдшер-акушер пууннарын тутууну сорудахтаабыта. Онон биһиги туруорсар балыыһабыт да тутуута соторунан түргэтиэн сөбүгэр эрэнэбит. Улуус кииннэммит бибилэтиэкэтин тутуута бу сырыыга эмиэ ыйыттылар.
Кырдьаҕас дьоммутугар болҕомтобутун уурар биһиги сорукпут диэн туран, улууспутугар бэйэтигэр кырдьаҕастар дьиэлэрин, ону таһынан эргэ тутуулаах дьиэлэргэ олорор соҕотох кырдьаҕастарбытыгар социальнай дьиэ тутуллуо дуо? Диэн “Абаҕа” ТОС салайааччыта Зоя Кузьмина ыйытар.Манна эппиэт биир, чуолкай буолла. Ол курдук, билигин дойду үрдүнэн, кырдьаҕастар дьиэлэрэ таас тутуу буолуохтаах диэн ирдэбилинэн улуустарга баар мас тутуулаах кырдьаҕастар дьиэлэрин сабан, биһиэхэ, түөрт Бүлүү бөлөх кырдьаҕастарын олордор бары ирдэбилгэ эппиэттиир дьиэ Ньурбаҕа тутуллан үлэлии турарын этэн туран, кырдьаҕаһы дьиэ кэргэҥҥэ ылан көрүү-харайыы соруга олоххо киирэн эрэрин бырабыыталыстыба бэрэссэтэбиитэллэрэ эттилэр. Өрөспүүбүлүкэҕэ да, биһиэхэ да приемнай дьиэ кэргэннэр бааллар.
Олохтоохтору уот тарыыба олус үрдүгэ салыннанар. Ордук, тэриллиилээх хаһаайыстыбалар ордук оҕустарабыт диэн улууспутугар тыа хаһаайыстыбатын бородууксуйатын дэлэтиигэ үлэлиир Станислав Семенов ыйытар. Ону сэргэ уотунан ититииниигэ холбонон олорооччулар дьиэ этээһиттэн тоҕо араастаһыылааҕын чуолкайдастылар. Манна СӨ бырабыыталыстыбатын бэрэссэдээтэлин солбуйааччы, бөлөх салайааччыта Георгий Степанов СӨ сыана бэлиитикэтин өттүттэн нэһилиэнньэҕэ сырдатыы үлэтин ыытыан наадатын бэлиэтээтэ.
Тыа хаһаайыстыбатын салаатыгар ыйытыы да, туруорусуу да элбэх буолла. Улууска мелиорация сулууспатын филиала аһыллыан наадатын Сунтаарга эрэ буолбакка, үгүс нэһлиэктэр туруорустулар. Күрүөлээһин, сири туһаҕа таһаарыы боппуруостара бу күннээҕи мунньах бэбиэскэтиттэн түспэтэ. Быйыл үүт туттарыытыгар сыана үрдээтэ эрээри, тоҕо былаан куччаабытын, о.д.а. ыйытыыларга тутатына хоруй, сороҕун боротокуолга киллэрэн, бырабыыталыстыба таһымыгар быһаарсыахпыт, үлэлэһиэхпит диэн отчуоттуур бөлөх салайааччыта эттэ.
Отчуоту истэ кэлбит олохтоохтор Бырабыыталыстабыта чилиэннэрин кытары уһуннук кэпсэттилэр, кыһалҕаларын этиннилэр.
Мунньаҕы түмүктүүр үөрүүлээх чааһыгар өрөспүүбүлүкэ, улуус сайдыытыгар таһаарыылаах үллэрэ сыаналанан элбэх киһи наҕараада тутта. Ол курдук, СӨ Бырабыыталыстыбатын грамотатын Лидия Саввинова, Мария Бекренева, Махтал суругун Гаврил Ермеев, СӨ үбүн миистиэристибэтин Махталын Эдуард Филиппов, “СӨ доруобуйа харыстабылын туйгуна” түөскэ кэтэр бэлиэни Светлана Михайлова, Зоя Степанова, СӨ үөрэҕин уонна билимин министиэристибэтин Бочуотунан грамотатынан Надежда Чжан, Махтал суругунан Мария Федорова.
СӨ Бырабыытаыстыбатын ааспыт сыллааҕы үлэтин сунтаардар “биһириибит” диэн сыаналаатылар.
Яина ВЛАСЬЕВА