Бүгүн, бэс ыйын 14 күнүгэр, Сунтаарга Чохулаах хонуутугар «Время чудес» диэн оҕо сайыҥҥы лааҕырдарын форума буолан ааста. Бу быйыл 6-с төгүлүн ыытыллар форуму Н.М. Родионова аатынан оҕо дьоҕурун сайыннарар киин кэлэктиибэ тэрийэн ыытта.
Форумҥа 6 лааҕыр: Сунтаардааҕы 1№-дээх, 2№-дээх, 3№-дээх орто оскуолалар, Сунтаардааҕы оҕо искусствотын оскуолата, Сунтаардааҕы политехническай лиссиэй-интэринээт уонна Н.М.Родионова аатынан Сунтаардааҕы оҕо дьоҕурун сайыннарар киин лааҕырдара кытыннылар. Бу лааҕырдартан уопсайа 8 хамаанда тэрилиннэ. Барыта 140-ча оҕо кыттыыны ылла.
Форум аһыллыытыгар Сунтаардааҕы үөрэх управлениетын начальнигын солбуйааччы Владимир Уаров кыттааччыларга уонна тэрийэччилэргэ эҕэрдэ тылын эттэ.
Хамаандалар визиткаларын көрүүтэ буолла.
Тэрээһиҥҥэ оҕолорго араас сүүрэр-көтөр, ойор хамсаныылаах уонна билиини-көрүүнү тургутар оонньуулар ыытылыннылар.
«Наш дом – Россия» диэн түһүмэх иһинэн оҕолор этэрээттэринэн арахсан үгүс оонньууга күрэхтэстилэр. Станцияларынан араас хайысхалаах оонньуулар ыытылыннылар: «Великие люди», «Есть такая обязанность – Родину защищать», «Фотолетопись Сунтарского улуса: облик человека и улуса», «Новый этап развития России: IT технлогии», «Архитектурный воркшоп: Сказочный город», «Я познаю мир», «Сказка», «Танцевальная», «Таптыыбын Сахам сирин».
Ол таһынан, ас күрэһин, хамаандалар эркин хаһыаттарын уонна тэриллиилэрин көрүү күрэҕэ буолла. Ону сэргэ салама баайыыта, үҥкүү, саахымат уонна спортивнай эстафета.
Ыытыллыбыт күрэхтэр түмүктэринэн, 3-с миэстэни Сунтаардааҕы 1 №-дээх орто оскуола, 2-с миэстэни Сунтаардааҕы политехническай лиссиэй-интэринээт ыллылар.
Көхтөөх киирсии кэннэ, эрэллээхтик Сунтаардааҕы 2 №-дээх орто оскуола лааҕырын хамаандата кыайда.
Бу үтүө күҥҥэ, ыраас күөх халлаан, чаҕылхай күн оҕолорго үгүс үөрүүнү бэлэхтээтэ. Сүүрэн-көтөн, айылҕалыын алтыһан, чэбдигирэн, астынан-дуоһуйан, сайыҥҥы биир үтүө күнү үөрэн-көтөн атаардылар.
Дмитрий ЫМЫЧАНОВ